“KIA gaw simsa ai hte laknak jahkrat kau ra ai.”“Laiza e, ya hte galaw ai mungshawa zuphpawng hta "Border Guard Force--- Jarit Sin Dap" gale na hpe ninghkap ma ai.”
“Myen hpyen n-gun 50,000 jan hpe Jinghpaw-Miwa ga jarit mayan Wunpawng Mungdan Shanglawt Hpung (KIO) a Ginjaw grup gra ni hta jahkrat tawn sai.”
“Lashu e daju ai Ya-Ma-Hka dap-up daju Maj-Gen Aung Than Htut gaw KIA dapba (4) dawm kau na lam lang hte lang tsun wa sai.”
“BSO-2 Lt-Gen Min Aung Hlaing gaw dapba 4 hpe dawm kau nna Jarit Sin Dap hpaw ya na snr Jinghpaw mung de htawt mu snr dai hpe myit n hkrum jang gasat shamyit kau na nga nna Hpawng Seng shawa hpawng hta September 30 ya shani tsun sai.”
“KIO a madung ginjaw ginra Liaison Bum, Laiza, Sinpraw Ginwang ginjaw Mai Ja Yang hte Dingda Ginwang ginjaw (Lahta Sam mung) Loikang ginra ni grupyin hta Myen hpyen ni shara la wa sai.”
“Myen hpyen asuya gaw mungdan kata na bawsang rawtmalan hpung ni hpe gasat na majan a matu, Shingja tsi (chemical agent) rawng ai Myawk Si ni hkyen lajang nga sai.”
“Dai myawk si hkrum sha jang, n sa sa chyat wa na, myi atsawm n mu wa na hte aten kadun malap mat na re.”
“Laiza bu ni gun-rai ni hpe lu ai manu hte dut, Miwa hkran de shalai, jarit-rap lakmat ni galaw da rai, myit n ji n mu hkam sha nga ma ai.”
“Anhte a ginra de Myen hpyen ni shang wa ai hte 1, 2, 3 hti nna Sinat Lashawng gang na matsun lu sai.”
“Myen hpyen ni hpyen shajin ai zawn anhte mung shajin da sai.”
“Hpu-nau rawt malan hpung ni hte hpyen-run manang galaw da sai.”
Dai mabyin yawng a ginlam gaw KIA hpe Jarit Sin Dap gale na hpe n yau la ai majaw rai nga ai.
Dai shiga ni hpe na jang mung kata nga myusha ni sha n ga panglai shinggan du myusha ni mung myit n ji n mu dum-bri dum-bra hkam sha nga ai.
Dai mabyin hpe mu jang, Chyoi Pra ai Chyum Laika, Ga Shaka Dingsa na Hezekiah (BC 715-686) prat na Yuda myusha ni hpe shingran mu shangun nga ai.
Dai hku byin wa ai gaw Hezekiah a shawng na hkawhkam ni maka n kap ai, Karai Kasang a ga n madat ai majaw rai nga ai. Raitim, Hezekiah gaw kawa Dawi zawn Karai Kasang man hta ding hpring ai amu galaw ai wa re. Shawng na hkawhkam ni galaw da ai gawkngu sumla shadaw ni, Ashera sumla ni hte Mawshe galaw ai magri lapu hpe jahten kau ai. Yehowa hta manoi manat nga n na n daw n hka let, Yehowa Mawshe hpe hkang da ai tara lam ni hpe hkan shatup nga ai. Hezekiah a prat e Yuda mung a bunghku shakum nga ai mare yawng Asuri hkawhkam Senahkerib wa gasat zingla hkrum ai. Aja hte gumhpraw shawa sha hkrum ai. Senahkerib a npu e taw na matu shagyeng hkrum ai. Juda mung masha ni Hezekiah a ga n madat na matu gung lau hkrum ai. Hezekiah a Karai Kasang gaw Yerusalam mare hpe n lu hkye na re ngu gung lau hkrum nga ai.
Yerusalam mare wang da hkrum ai. Dai lam ni hkrum sha tim, Asuri ni hpe asum n jaw ai sha n ga gum lang nga ai. Hezekiah gaw Asuri a lata na hkye la na matu Karai Kasang hpe kyuhpyi ap ai. Yehowa gaw shi a kyuhpyi ga hpe na ya ai. Dai shana jang Yehowa a lamu kasa pru sa nna, Asuri hpyenla 185,000 hpe sat kau u ai. Asuri hpyendap brun mat nna Neniwe mare de nhtang mat ai. (2 Hkawhkam 18-19)
Hezekiah zawn Karai Kasang hte manoi manat n daw n hka hkawm let, anhte a mabyin hpe Yehowa a lata e ap jang gaw, Myen hpyen n-gun 50,000 jan hpe lamu kasa ni sat shamyit na, n law nga ai. Dai chemical pala Shingja tsi ni shanhte mahtang kapaw si na re. Myen ni majan sum na re. Anhte mahtang majan dang na lai nli re.
