Chyum ga: (Sh.k 102:26-27)
Ga Nhpaw
Myanmar mungdan hpe ningnan galai shai kau na shaning rai na kun, pyaw wa na kun, grau yak wa na kun, nga nna masha law law wa myit ung ang nga ai shaning mung rai nga ai.
Hpa mi raitim, shaning ningnan hta, (1) Myit masin ningnan hte asak hkrung lam ningnan hta hkawm sa ra nga mali ai; (2) Ngwi pyaw ai hte lawt lu ai hkrun lam ningnan hta hkawm sa lu ai ni tai ra na ga ai. Ndai hkrun lam hta hkawm sa lu na matu Chyum Mungga hta Yesu Hkritstu sharin da ya sai. Lahta na lam lahkawng hte seng nna lawu na hte maren daw masum hku jawm myit yu let n-gun la ga ngu ga saw mayu nngai.
1. Yesu Hkristu hte hkrum ai ni ningnan tai wa ma ai
Yesu Hkritstu hte hkrum ai ni myit masin ningnan, masha ningnan, prat hkrun lam ningnan hte hkawm sa lu ma ai. Masha law law hpe ninghtoi jaw lu ma ai, lam woi lu ma ai. Chyum laika kaw na Yesu Hkristu hte hkrum ai hpang ningnan tai wa ai ni law law hta na, marai lahkawng a lam hpe tsun shaleng mayu ai.
Simun Petru: Simun Petru gaw, Yesu Hkristu hte n’hkrum shi yang Nga hkan sha ai wa re. Nga hkwi nna pu kan bau ai magam bungli galaw ai wa rai nga ai. Raitim, Yesu Hkristu hte hkrum ai hpang Nga hkwi ai Petru gaw masha hpe hkan hkwi ai Simun Petru tai wa sai. Yesu Hkristu hte hkrum ai hpang Petru gaw myit masin ningnan, masha ningnan, prat hkrun lam ningnan tai wa sai re.Pawlu: Pawlu gaw, Yesu Hkristu hte n’hkrum shi yang Hkristan ni hpe sat shamyit ai Roma hpyendu kaba Shawlu re. Hkristan ni hpe n’ju n’dawng ai wa re. Yesu Hkristu hpe n’ra ai wa re. Dai majaw, Yesu Hkristu hpe kam sham ai Hkristan ni hpe zingri zingrat ai hte sat shamyit ai bungli galaw ai wa rai nga ai. Damasku mare na Hkristan ni hpe sat shamyit na matu gumra jawn let, dakran sa wa ai hkrun lam n’tsa e, Hkristu hte hkrum nna, myit malai majing lu la mat sai. Yesu Hkristu hte hkrum ai hpang Hkristan ni hpe zingri sat ai hte Yesu hpe n’ju ai hpyendu kaba Shawlu gaw, Yesu hpe tsawra kam sham ai Pawlu tai wa sai. N’hkru dik ai du kaba Shawlu kaw na, myit masin ningnan, masha ningnan, prat hkrun lam ningnan hta hkawm sa ai Pawlu tai wa sai re.
2. Yesu Hkristu hta sha ngwi pyaw ai lam ningnan lu la ai
Yesu Hkristu hpe chye ai ni da, n chye ai ni da yawng hte gaw, “Ngwi pyaw ai lam” hpe ra marit ai ni hkrai rai na re. Aristotle tsun ai, shinggyim masha yawng a hpang jahtum na bandung shadaw gaw, ngwi pyaw ai lam (happiness) re, nga ai. Anhte Hkristan ni gaw si ai hpang htani htana asak lu la na lam rai nga ai. Raitim, asak naw hkrung nga ai ten hta shinggyim masha ni ra marit nga ai hpang jahtum na lam gaw ngwi pyaw ai lam (happiness) rai nga ai.
Dai ngwi pyaw ai lam hpe Yesu Hkristu hta lu la mai nga ai. Ngwi pyaw ai lam (happiness), ngwi pyaw simsa ai lam (peace), tengman rap ra ai lam (justice) ni matut mahkai hkat nga ai lam hpe myit yu ga. Ngwi pyaw ai lam (happiness) lu la na matu, simsa ai lam (peace) lu la ra nga ai. Ngwi pyaw simsa ai lam lu la na matu, tengman rap ra ai lam (justice) byin ra nga ai. Lachyum gaw, tengman rap ra ai lam n’nga jang simsa ai lam lu la na n’re; simsa ai lam n’nga jang, ngwi pyaw ai lam (happiness) lu la na lam n’mai byin nga ai. Dai majaw, ngwi pyaw ai lam hpe ra marit nga ai Myanmar Mungdan hte mungkan masha ni, wuhpawng wuhpawng ni shagu hta tengman rap ra ai lam hpe shawng lu la hkra jawm shading sharai ra na re. (Ga shadawn: Myanmar Mungdan a gaw da ai tara hte Upadi ni teng man rap ra lam hpe jaw ya lu sani? Wuhpung wuhpawng ni hta teng man rap ra ai lam nga sani?).
Tengman rap ra ai lam n’nga ai mungdan hte wuhpung wuhpawng ni hta ngwi pyaw ai lam (happiness) lu la na galoi mung n’mai byin nga ai. Hpa majaw nga yang, tengman rap ra ai lam (dinghpring ai lam) hte ngwi pyaw simsa ai lam hpe garan jahka kau n’mai nga ai. Langai hte langai mahkri shawn, aru jung, matut mahkai hkat nga ai lam Chyum laika hta tsun da sai re (Esai 32:16-17).
Yesu Hkristu gaw Ngwi Pyaw Du Madu re lam Chyum laika hta tsun da ai re. Yesu shi nan tengman ai hte asak re lam tsun da sai. Dai majaw, na a sak hkrung lam, hte anhte a Myanmar Mungdan hta ngwi pyaw simsa galu kaba ai lam lu la hkra , mungkan masha ni yawng ngwi pyaw ai lam lu la hkra, tengman rapra lam hte ngwi pyaw ai lam hpe jaw ya lu ai Yesu Hkristu hte rau shaning ningnan hta sak hkrung sa wa ga.
3. Yesu Hkristu hta sha shanglawt lu ai
Shanglawt lu ai ngu gaw galai shai ai lam langai re. Gyit hkang da ai kaw na lawt lu ai lam re. Tsawra myit ngu ai gaw kumhpa raitim, lawt lu ai lam gaw kumhpa n’re. Machyi hkam ra ai, arang bang ra ai lam re. Karai Kasang gaw mungkan hpe shalawt na matu Yesu Hkristu hpe jaw ya sai. Yesu machyi hkam ai, si hkam ai re. Bai hkrung rawt ai, si du hpe awng padang lu ai hte shinggyim masha hpe yu bak mara kaw na shalawt dat sai re.
Yesu a hkye la ai magam bungli madung gaw shalawt dat ai lam, masha hpe masha zawn asak hkrung lu hkra karum ai lam, dai hpang shanhte a shawng lam (future) hpe lajang ya ai lam re. Yesu Hkristu gaw nawku htung (tara) hpe manat let gyit hkang da hkrum ai lam, jinat tsu minla, hpyi masawp ni a hkrit tsang hpa lam hte yu bak mara a myu myu kaw na shinggyim masha ni hpe hkye shalawt sai re (Yawhan 3:16). Hkye shalawt hkrum ai shinggyim masha ni nan, dai hkye shalawt ai magam hpe matut galaw na matu re. Dai majaw n’tara ai, n’jaw ai, dip sha hkat ai lam ni hpe ning hkap ai, shading sharai ai n’sen hpung shawa, mungchying shawa kaw na pru wa ra ai. N’hkru n’shawp lam amyu myu hte arawn alai hten za lam ni kaw na hkye shalawt let ningnan shabyin na matu shaning ningnan hta myit masin ningnan hte hkyen lajang ra na re.
Tsawra myit ngu ai gaw kumhpa raitim, shanglawt lu ai ngu ai gaw kumhpa n’re. Awng padang dim nna lu la ra ai amu re. Yesu mung dai zawn galaw lai wa sai. Shanglawt lu ai sak hkrung lam , shanglawt lu ai amyu, shanglawt lu ai mungdan, shanglawt lu ai mungkan tai lu na matu, tengman ai lam hpe hka zawn lwi nga hkra shabyin ra ai (Amo 5:24). Tengman ai lam hpe shabyin lu jang, tengman ai lam pru wa na re. Chyum laika hta, “...dai tengman ai gaw, nanhte hpe shalawt dat na ra ai,”nga ai (Yawhan 8:32 b). Tengman ai lam hpe jum tek da lu na matu, tenman ai lam hpe mu chye ra na re.
Yesu tsun ai, “nanhte nye a ga hta a grin nga myit yang gaw , nye a sape teng teng nanhte rai nga myit dai: tengman ai lam mung nanhte chye lu na marin dai”, nga ai (Yawhan 8:31-32). Shanglawt lu ai madang ai kaw na hpajang ai ni tai wa ga, mayam n’tai ai hte n’ngut ai, madu mung naw tai ra ga ai. Yesu Hkristu hte rau madu myit rawng nna tsadan nat e dip da hkrum ai masha law law hpe shalawt ai sasana amu hpe mung matut shachyen shaja galaw ai ni tai ra ga ai. Yesu Hkristu hta shanglawt majing lu ai ni tai lu hkra shawng de lahkam sa wa ga.
Ga Hpungdim
Mayam ngu ai gaw madu hte kaga ga nga ra ai; ginhka da hkrum ai; dip da hkrum ai; gyit hkang da hkrum ai ni re. Jinghku/hpu nau ngu ai gaw shada karum shingtau hkat ai; shada da madi shadaw hkat ai; pu gang sin machyi hkat chye ai ni re.
Yesu tsun ai gaw, “Ya kaw nna ngai nanhte hpe mayam n’ngu na ni ai; kaning rai n’me law, mayam gaw madu galaw amu hpe n’chye wu ai: nanhte hpe jinghku she ngai ngu na made ai,” nga ai re (Yawhan 15:15). Dai majaw, Yesu hpe kam sham ai ni gaw, Yesu hte jinghku rai sai. Karai Kasang hte shinggyim masha grai shai hkat ai raitim, Karai aya hpe shagawm kau nna shinggyim masha hte maren mara hku shatai masat la sai re.
Lachyum gaw, mayam madu hte mayam ni, lu su ai ni hte matsan ai ni, hpaji chye arawng aya lu ai ni hte grit nem ai ni, amyu kaba hte amyu kaji ni, masha jahpan law ai ni hte n’law ai ni, n’gun ja ai ni hte n’gun yawm ai ni yawng hpe ginhka na lam n’nga ai sha shinggyim masha yawng hpe maren mara shatai kau ai lam rai nga ai. Dai majaw, Yesu Hkristu gaw, shinggyim wuhpawng hpe galai shai ai wa, tengman rapra ai lam hpe galaw ai wa, ngwi pyaw ai lam hpe shabyin ai wa nan rai sai. Yesu hte rau rai yang anhte mung dai lam ni hpe shabyin lu na re.
2010 ning hta, Myanmar mungchying masha yawng myit masin ningnan, sak hkrung lam ningnan lu la let, ngwi pyaw ai hte lawt lu ai hkrun lam ningnan hta hkawm sa lu mu ga law. Amen.
Sara Nhkum Tang Gun gaw J.W Hkalup Hpung Mungshawa Zuphpawng (KBC snr JHZ) a ramma hpa-awn re.
