Nye prat 1970 kaw n’na shanglawt, K.I.A dap, dap madung 11 de du shanglawm n’na, 1971 ning htum wa maga de Htai mung de du ni ai. Shingrai 1975 ning hta e, anhte a KIA hpyendap kata hta e, n’ru n’ra byin wa ai majaw, bra hkawm mat wa saga ai.De hpang 1977 ning hta anhte shanglawt hpyenla dingsa ni htai mung kata e, Wunpawng Jinghpaw kahtawng jawm de hpang saga ai. Dai kaw, shanglawm ai share manang ni gaw,
1. Lahtaw La Doi ------------ dap madung 8
2. Labang Tu -------------- dap madung 8
3. Gawlu Tu --------------- dap madung 1
4. Gumrin Naw ------------ dap madung 3
5. Chongzang Hkawng Hawng -------- dap madung 2
6. Hkachyang Hkun Yung ------------- dap madung 11
Ndai yawng gaw, Htai mung Chiangmai ga e, Wungpawng Jinghpaw kahtawng jawm de shakut wa ai ni rai ga ai.
Ya yang byin taw nga ai masa hte hkam sha lam.
Moi anhte hpe, tinang a amyu hte mungdan a matu jawm shakut ga nga n’na, nam kata e, jamjau jamhkau hte woi rawng, Myen ga n’ga shangun ai hta n’ga n’na “Myen basing” bu ai Wunpawng shayi ni hpe wanleng n’tsa hkan e n’hkyi hte basing ni gang je kau ya rai, Htai mung de yu wa ai shaloi raitim, anhte hpyen ma ni hpe “Wuloi zawn zawn” lungseng kaba ni n dang gun ai raitim, hte gun si shangun rai, dai ni gaw, amyu hte mungdan a matu re da. Dai ni rai jang, Wunpawng bum ga mung krin ma nna, mungdan sut gan mung, htum ma sai. Dai ni gaw, kadai wa galaw ai re i? myit yu ga.
Bai maigan de du taw nga ai ningbaw ningla ni raitim, yi sun hkau na ni mari sumpum da, dum n’ta ni hkik hkik hkam hkam gaw shachyaw, mawdaw ni mung kade n na yang galai galai rai, zuphpawng hpawng tim Hotel kaba yang kaba sai nga ai hkan she gumhpraw shama hkawm. Moi anhte hpe gaw “shat hkyep langai sha jahkrat tim, mungshawa masha a salu salat re” nga, kayat ma ai, dai ni “dai myit masa lam ni” gara de du sani?
Grai san mayu n’ngai, re, san mung n’mai, hpa majaw nga yang, Wunpawng htunghking nan wa dai hku rai nga ai. Dai gaw, hpa re i? nga yang, “Nanhte ma ni hkum shaga da, re hpa mung n mai san, hpa mung n mai tsun ai anhte Wunpawng sha ni a gam maka a hpa-awn ni”, rai ma ai. Anhte mungshawa masha ni hpe “manya (mana)” ai ngu nna sawn ma ai kun? Myit yu na zawn ngu n’ngai.
Makam masham lam hta raitim, Chyum Mung Ga kaw tsun da ai, “Na htingbu wa hpe, na hkum hte maren tsaw ra u. Na Karai Kasang hpe na n-gun htum, atsam htum, baw nu htum, hte up nawng u”, nga ai re. Raitim, dai ni na mabyin gaw, htingbu wa mawdaw n lu, gumhpraw n lu rai jang, n-gun mung n rawng mat, atsam mung htum mat re ai hpung sara ni hpe mu lu n’ngai. Raitim, phone dip pat kau na atsam marai gaw naw rawng ma ai. Dai hta grau ai lam gaw, Chyum Laika hpe daw kaji daw kaba sha joi la n’na, alu atan law law bang hkra chye hkaw tsun nga ma ai. Masha wa a kun dinghku hpe hkan shalau re hpung sara ni mung nga ma ai. (kaja wa nga yang madu Yesu mung daw kaji daw kaba lang nna tara n hkaw ga ai) Dai re majaw, kalang lang gaw, madu Yesu grai n du yu wa yang, (Martin Luther) hpe shawng ndai prat hta sa paw shangun na zawn ngu n’ngai.
Myit mada let jawm myit yu na lam
Lahta de tsun lai mat wa sai yawng a kata e, anhte wung pawng sha ni kaw e,
1. Du magam masa (monarchy system)
2. A na magam masa (autocracy system)
3. n’kau mi sha a A na (oligarchy system)
N’dai system 3 hpe n’lu shatsai kau lu yang,gara hku n’na mung, shanglawt lu na n’re.awng dawm ahkaw ahkang lu tim, anhte shada sat hkat, nat hkat n’na mung masha grau machyi na lam sha nga ai.
