Dap ba lahkawng hte, ya, hpyen n-gun 1,500 nga ai KDA gaw, hpyen n-gun 100 npu sha nga ai, N’gawn hpyen (pyi-tu-tsit) hpung lahkawng de gale hpaw ai lamang hpe, KDA daju, Kutkai makau, Kawng Hka e galaw sai lam, lamang sadu lawm ai ni tsun ai.
Ndai lamang hta, KDA hpyenla ni hpe Myen a N-gawn Hpyen hking ningnan galai ai lam galaw ai nhtawm, shanhte gaw Lashu-daju Myen hpyendap a Sinpraw Dingdung Daw Daju (Ya-Ma-Kha) a ading tawk yu reng npu de du mat sai lam, KDA hte ni kahtep ai ni KNG de, daini tsun ai re.Kanu KIO/KIA na ga garan pru ai, 19 ning na ai hpang, ya na zawn, Mahtu Naw woi awn ai Kachin Defense Army (KDA) dap, mat mat wa sai lam re.
Bai, ndai laman KDA gaw tinang a laknak kaba ni yawng hpe Myen hpyendap de ap na, hkyen lajang nga sai re. Kaja wa nga yang, lai wa sai January 21 ya shani hta KDA laknak kaba ni yawng Ya-Ma-Hka de ap na, Myen matsun tawn sai lam, KDA salang ni tsun ai.
Shawng de KIA dap ba 4 rai nga ai, KDA hta, kanu uhpung na ga garan pru ai ten lawm wa ai, amyawk 50 mm, 60 mm, 75 mm, 82 mm hte 120 mm ni ram ram lu tawn ai lam, chye lu ai.
Maning htum wa ten kawn, kanu KIO/A na ga garan pru mat wa ai J.W laknak hpai hpung ni langai hpang langai Myen npu de shang mat sai hta, ya, KDA gaw hpang jahtum rai nga ai.
Maning October 16 ya hta, Lasang Awng Wa Simsa Lam Hpung gaw N-gawn Hpyen gale nna, Zahkung Ting Ying woi awn ai, New Democratic Army-Kachin (NDA-K) gaw, November praw 8 ya shani, Myen a Jarit Sin Dap de gale sai re.
Mung kata na hpyen masa yu maram ai ni tsun ai gaw, ya na zawn, KIA na garan pru ai laknak hpai hpung ni hpe, Myen asuya hku nna atik anang dap galai shangun ai yaw shada lam majing gaw, kanu KIA hpe Jarit Sin Dap (BGF) gale na matu, grau grau htu n-gun jaw ai lam re, nga ai.
January 29 ya shani hta sha, 10 lang ngu na KIA Jarit Sin Dap gabaw ntsa, Myen-KIO salang ni Myitkyina e hkrum shaga sai raitim, mahtai n pru ai lam, KIO salang ni tsun ai.
| Comments |
|
|
|||||||||||
|
|||||||||||
|
|||||||||||
Powered by !JoomlaComment 3.26
