Wunpawng Mungdan Shanglawt Hpung (KIO) a Ginjaw Komiti malawm hte Zai Ninggawn Dap, yu reng du Col. Sumlut Gun Maw a ninggyi kanu Ying Wang gaw, ma marun la kasha lahkawng hpe ga shangai la ngut sai hpang, kade n na yang si mat wa sai lam, chye lu ai.
Myitung Hkawn snr Ying Wang (asak 24) ning gaw, October 20, ndai bat Langai Ya shani, Jinghpaw Mungdaw mare daju, Myitkyina Mungshawa Tsirung kaba e jahpawt hkying 10 ram hta kan ga ma shangai la ngut sai hpang, shana de pyen 2 ram hta n nga mat wa ai lam, Myitkyina shiga lawk kawn chye lu ai.
Shayi Myitung Ying Nam, Ying Wang a kanau KNG de tsun ai gaw, kana n si shi yang 'ma yu mayu ai law' nga ai majaw ma madun yu sai hpang, 'grai ba ai, n'shang (ginshang) machyi ai' nga ai 'ga' ni sha tsun wa nna, n sa hti si mat wa ai re, nga ai.
Raitim, ma marun lahkawng gaw hkamja nga ai rai nna, ma marun yan nau hpe dai shani jang, Dukaba Gun Maw gaw gap ya ai, Ying Wang a dum nta (gawgap n ngut shi ai htap lahkawng wutdek nta), Tatkone (Dapkawng), San Pya lawk de woi wa sai lam, chye lu ai.
Bai nna, dai shani shana de sha, Myitung Hkawn a moimang hpe mung, tsirung kawn dum nta de htaw la wa nna, October 21, mani Bat Lahkawng ya shani hta, Myitkyina mare, Jaw Bum Wunpawng Hkristan Lupding Lupra e akyu hpyi makoi mayang sai lam, kahtap chye lu ai.
Ying Mayaw gaw KIO a EEDY (Education and Economy for Youth) jawng ngut sai shayi sha mung rai nna, 'shan hpraw hpraw hte kaji seng seng rai, hkum gawng shingyan tsawm ai' Wunpawng shayi sha langai mung re. Dai daw buga gaw Hpakan sa lam, Ka Mai mare na rai nna kawa Myitung Ying Sau (World Concern-Myitkyina kaw amu galaw let n nga mat wa sai) hte jan Waje Hka Tawm yan a shayi sha re lam, chye lu ai.
Shi naw n si shi yang, Ying Wang gaw KIO daju Laiza e KIO hte jawm hpaw tawn ai 'Hka Nan' computer hte laika copy seng langai a lithkam mung rai wa sai lam, Laiza shiga lawk kawn chye lu ai.
Raitim, n myit mada ai sha, dinghku la Dukaba Gun Maw kawn n'gyi shaba (shabat) kau dat ai majaw, dai hpe Dukaba hku nna 'ma jahkrat' kau na matu tsun yu sai raitim, Ying Wang gaw 'ma jahkrat gaw n gwi ai law' nga ai majaw, hpang jahtum Laiza seng kawn San Pya dum nta de wa ra ai madang du mat ai lam, Ying Wang hte ni kahtep ai shiga lawk kawn chye lu ai.
Ying Wang dum nta de wa mat ai raitim, Dukaba Gun Maw hte Miwa phone hte matut mahkai lam gaw dingyang naw nga nga ai sha n ga, ra nga ai ja gumhpraw hpe mung shata shagu sen 1, 2 rai, masha dat nna dingyang shagu jaw wa sai lam, KNG kawn sagawn chye lu ai.
Raitim, akajawn sha Ying Wang ma shangai na ten ni wa mahka, lai wa sai August shata praw kawn Dukaba Gun Maw a ja gumhpraw lu la nga ai raitim, Ying Wang hku nna dukaba Gun Maw hte ading tawk matut mahkai n lu mat wa ai lam, chye lu ai.
Dai re majaw, Ying Wang a dum nta masha ni gaw Dukaba Gun Maw hte hkrum mayu ai majaw, lai wa sai September shata laman, seng ang ai KIO rung de salang dat na maw mawn wa ai ten, Dukaba Gun Maw hte matut mahkai lam bai hkrang wa ai lam, KNG kawn sagawn chye lu ai.
Ying Wang ma shangai na matu tsirung rawng hpang wa ai ndai October shata 15, lai wa sai bat masum ya shani kawn October 21, mani makoi mayang poi galaw ai ten du hkra, hkrat ang ai ja gumhpraw ma hkra hpe Dukaba Gun Maw kawn lit la ya sai lam, matut chye lu ai.
Raitim, Dukaba Gun Maw hku nna shi a ninggyi kanu Ying Wang, ma shangai ai nhtoi hte makoi mayang poi nhtoi hta, shi a ma ni (masha) dat ai hta lai nna, shi nan gaw n sa du lawm ai lam, KNG kawn sagawn chye lu ai.
Dukaba Sumlut Gun Maw gaw, lai wa sai 2001 ning Dukaba N'ban La Awng woi awn nna, mazut dik ai KIO/KIA Ningbaw kaba Malizup Zau Mai hpe arawng arang jahkrat kau ngut sai hpang, dung up atsang kawn Zai Ninggawn Du hte Ginjaw Komiti malawm astang de, aya gum htawn shalun hkrum ai wa mung re.
Dukaba Gun Maw gaw, ma lahkawng lu ai dinghku la langai mung rai nna, KIO a EEDY hpe lit la woi hpaw ai hta mung shanglawm ai sha n ga, ta tut yu reng ai wa mung re lam, KIO shiga lawk kawn chye lu ai.
