Kachin News Group - Kachin

Wunpawng Mungdan Shanglawt Hpung (KIO) gaw, shi a Mai Ja Yang uhpung ginra na, shawng de, J.W Amyu Sharawt Hpung (PKDS) kawn zing la ai ECI jawng hpe 'ja gumhpraw yak hkak ai manghkang a majaw' ngu nna, dai ning 2009, shaning ningnan ten kawn tsepkawp dawm sai hte jawngma ni hpe mung jawng kaga de htawt shangun sai lam, chye lu ai.

Ndai 'English and Computer Institute (ECI)' jawng hpe naw lung shakre ra ai jawngma ni hpe, KIO a 'Internship English Program (IEP)', English madung sharin ai jawng de mahtang htawt lung shangun ai re lam, Mai Ja Yang shiga lawk kawn chye lu ai.

Ndai lam hte seng nna, ECI jawng sara langai tsun ai gaw "Dai ning 2nd year lung na jawngma ni gaw, jawng matut lung na matu n-gun dating taw nga yang she, ya jawng masa wa ndai hku galai shai mat wa ai rai jang gaw, shanhte hta myit n pyaw lam gaw nga sam ai" nga nna, KNG de tsun wa ai.

ECI jawng e, Computer, English laika hte Miwa laika ni hpe madung sharin ya nga ai hta, jawngma ni myit lawm htum gaw, computer internet hpaji re lam, jawngma langai tsun dan wa ai.

English ga hte laika sha madung sharin ai, IEP jawng de ECI jawngma ni jawng htawt lung na myit n hkawn ai majaw, dai ning matut lung na jawngma ni yawng marai 11 gaw, IEP a malai kaga jawng ni de mahtang htawt lung hkyen nga sai lam, jawngma ni kawn chye lu ai.

Bai, KIO Ginjaw Hpaji Dap gaw ECI na jawng-up sara hte sarin sara ni hpe mung, jahkring kau sai lam chye lu ai.  ECI jawng hpe lahkawng ning lung ra ai rai nna, laning mi jawng shabrai gaw Miwa gumhpraw Yuan 2,500 re lam, sagawn chye lu ai.

Lai wa sai 2006 ning hta, KIO gaw J.W Amyu Sharawt Hpung (Pan Kachin Development Society, PKDS) kawn lit la hpaw tawn ai Mai Ja Yang na Pan Kachin College (PKC) hpe magra zing la nhtawm English and Computer Institute, ECI ngu, galai shamying kau ai, rai nga ai.

Ndai zawn zing la ai lam ningpawt gaw, KIO hte PKDS ningbaw Duwa Bawmwang La Raw lapran byin ai mahkang (2001 ning hte 2004 ning laman, KIO Ginjaw kata arawng aya gashun hkat ai manghkang hta Duwang Bawmwang La Raw shanglawm ai lam ni) a majaw re lam, chye lu ai.

Kaja wa nga yang, ndai PKC jawng hpe, lai wa sai 1990 ning hta, KIO uphkang ginra Mai Ja Yang e hpaw na KIO ahkang jaw ai hte maren, hpaw wa ai, rai nga ai.

Shawng de PKC jawng naw rai nga yang, dai jawng na ningtawn ai jawngma nkau hpe maigan de hpaji sharin hpungja na lam ginjang ni tam ya ai majaw, Jinghpaw ramma ni law law myit lawm wa sai lam, KNG kawn sagawn chye lu ai.