Kachin News Group - Kachin

Dai ni, Jinghpaw mungdaw mare daju Myitkyina, Shatapru Jinghpaw Wunpawng Htunghking Manau Wang hta jahpawt daw hkying 8 e galaw wa sai 'Mungdaw Nhtoi' manau nau ai hta Wunpawng Mungdan Shanglawt Hpung/Dap (KIO/KIA) na masha n-gun 1,500 jan shanglawm wa sai lam, chye lu ai.

Ndai manau hpe KIO/KIA ni sha woi awn nau ai rai nna, shanhte KIO/KIA uhpung na kaja wa manau poi de sa du ai masha yawng gaw marai 1,600 jan ai lam, Manau Shabyin Shatai Komiti shiga lawk kawn chye lu ai.

KIO/KIA manau ngut ai hpang, dai hpawt daw sha matut manoi, Miwa mung, Yunnan, Sap Hkung mungdaw na Jinghpaw Htunghking Hpung ni woi awn let 'Sha Manau' nau wa sai re.  Ndai manau hta Miwa mung na Jinghpaw ni mung marai 300 jan shanglawm manau nau wa sai, rai nga ai.

Dai hpang, shana de pyen 2 hta gaw, J.W Htunghking Ginjaw ni woi awn let 'Shawa Manau' hpe bai nau wa sai re.  Ndai manau hta gaw Sam mung, Mandalay hte Yangon de na J.W amyusha ni shanglawm manau nau wa ai re.

2009 ning, January 10, hpawt ni gaw, 'Jinghpaw Mungdaw' ngu ai Myen mung kata tara shang byin pru wa ai gaw 61 ning tup ladu hkrum ai nhtoi rai nga ai. Dai re majaw, jahpawt daw hkying 8 hta 'laksan Mungdaw Nhtoi Manau kaba' n hpang shi yang, Jinghpaw hte Myen hpyen asuya du salang lahkawng kawn Mungdaw Nhtoi mungga shaga wa na re lam, chye lu ai.

Ndai dai ning na, January praw 5-11 ya du hkra galaw ai Mungdaw Nhtoi Manau Poi a matu, Manau Poi Shabyin Shatai Komiti hku nna gumhpraw budget Myen Kyat sen 2,000 jan (US $175,439) jahkrat tawn ai rai nna, ndai budget gaw maning na poi hta ga-ang hkup yawm mat ai re lam, chye lu ai.

Dai hta, uhpung hte dinghkrai masa hku nna 'Manau Poi Alu' jaw bang ai ni hta, KIO gaw Kyat sen 300 (US $26,316), Lasang Awng Simsa Lam Hpun gaw Kyat sen 50 (US $4,386) hte Hpakan na lungseng company ni kaw hta lahkawn lu ai gaw Kyat sen 600 (US $52,632) jan re lam, Manau Poi Shabyin Shatai Komiti shiga lawk kawn chye lu ai.