Kachin News Group - Kachin

Ya ten hta Mai Ja Yang hta myihprap wan hte phone ni hpe Miwa asuya hku nna pat tawn ai hpang, February 7 ya shana hkying 1:00 a.m. (yuptung) ram aten hta nan, Mai Ja Yang nga Miwa ni yawng tinang nang a arai pyi yawng n lu hta la hkra rai, Mai Ja Yang ga jarit hku nna, yan yu wa sai lam, buga masha langai KNG de tsun dan wa ai.

Lahta na buga masha wa tsun ai, "Ya ten hta Mai Ja Yang hta Jinghpaw hte Sam ni sha ngam nga sai re. Miwa ni gaw yawng daram Miwa Mung de hprawng wa mat masai. Ya ngam nga ai Jinghpaw hte laga ni yawng mung grai hkrit maja let nga nga ma ai re. Hpa majaw ndai hku byin nga ai kun? ngu yang -- Miwa mung kata hta Myen hte Miwa hkrai san re nna, zuphpawng galaw ai hta Myen ni hku nna, Miwa ga hku shang nhtawm Mai Ja Yang de hpyen n-gun hte sa du jep joi na nga ai."

Dai hta langai mi rai yang gaw, ndai laman masum ya daram, Miwa mung kata Ruili (Shweli) mare kaba kaw KIO hte Miwa asuya ni Mai Ja Yang manghkang hte seng nna, jahkrum ai hta Miwa asuya hte loi ga lai lai hkat ai hpang, KIO hku Mai Ja Yang hta nga ai Miwa ni yawng hpe KIO htuk jaw da ai (mat-pung-tin) jep nna, dai n lu ai ni yawng hpe rim na nga ndau laika shana shabra ai lam chye lu ai.

Dai hta n-ga, KIA hpyenla ni laknak hte hkrak rai, Mai Ja Yang hta, grai kashai kabrawng wa ai lam ni a majaw mung grau nna, Miwa ni ya na zawn kajawng kaja hte yuptung hta hprawng dumbre mat ai re lam chye na lu ai.  Dai shana shiga nau kahtet ai majaw, Mai Ja Yang ting n yup ai sha, sadi maja rai lai wa sai lam, buga masha ni tsun dan wa ai.

Lai wa sai January shata 28-30 ya ni laman, Myen ni Mai Ja Yang de sa du jep joi ai shaloi, KIA hku nna, Myen gumhpraw sen 60 ram hte jaw ginhtang kau dat sai, re lam chye lu ai. Dai hpang, KIA gaw February 6 ya shani e sha, Mai Ja Yang na hpaida dabang langai mi hpe hpya kabai kau sai. Myen ni hku nna, praw 9 hte 10 lapran kalang bai sa du shang na re lam mung shiga kabrawng nga ai.

Ya ten Mai Ja Yang kata, shawoi na zawn wu wu di di n re sha, grai hkun hkraw mat nna, nta kaman hkrai raimat sai lam, sagawn chye lu ai.