Shanglawt uphkang shara, N-gumla Lahta Tsang Jawng e lahta tsang sharin sara hte dai buga dai daw, sara num Lahpai Roi Tawng gaw, Myitkyina, N-Jang Dung buga e shi kawa n nga mat ai majaw, yu wa ai ngu yang, U Shi Zup kahtawng makau, Masum Zup hka rum e buga ten hkying 1:15 p.m. ram hta jakli galau nna, si mat ai re lam, jinghku ni tsun ai.Jakli ntsa masha yawng 16 lawm ai hta, marai 8 si, marai 8 asak lawt mat ai rai nna, si ai malawng gaw ja htu masha hte buhkawm masha ni re lam, matut chye lu ai.
Seng ang ai KIO masha ni lit la let, sara num a moi mang hpe hkan tam nga ai raitim, ya ten du hkra n mu ai lam, Myitkyina na shiga jinghku ni hpe lakap let chye lu ai.
Sara num Roi Tawng gaw lai wa sai 2008 ning kawn shi n nga mat ai ten du hkra, N-gumla Lahta Tsang Jawng e amu gun nga ai re lam, KNG sagawn chye lu ai.
Maning 2009 kawn ya ten du hkra, ndai Masum Zup hka rum e sha jakli dagup ai mabyin ni, yawm dik 5 lang byin lai wa sai lam, jakli gawt sha ai ni tsun ai.
Mali hka hku, hka lam dingyang ja ladu lai htu sha ai majaw, hka lam pat mat ai lam hte, ya ten, hka hkyet ai aten mung re majaw, jakli galau dagup na tsang ra ai re lam, ndai lam de gin hkrang nga ai jakli gawt ai ni hku chye lu ai.
Myitkyina hte Mali Hka hku lapran, lani mi jakli 10 ram gin hkrang hkawm nga ai hta, shani shagu lung de li 2 nga nna, yu de li 5 nga ai lam, buhkawm masha ni tsun ai.
N-gumla-Myitkyina lapran, hkarang lam hku mai sa ai raitim, mawdaw manu law ai, lam n tsawm ai hte du lanyan ai lam ni majaw, lahkawng ya daram sha na ai, hka lam hpe mahtan, buhkawm masha ni grau hkawm sa nga ai re lam, KNG sagawn chye lu ai.
Madung hka lam hku hkawm nga ai ni gaw, ja htu ai ni hte, gat dut masha ni sha rai nna, hka hpungla ja ai majaw, jahkring hkring hkali dagup, masha si tim, shanhte dai hkrit tsang ra ai hka lam hpe sha manoi manat hkawm sa nga ai lam, buhkawm masha ni tsun ai.
| Comments |
|
Powered by !JoomlaComment 3.26
