Kachin News Group - Kachin

Gala mungdan mare daju, New Delhi kaw du nga ai, Jinghpaw ni hte, hpu nau myit rum, yawng 70 jan lata masat galaw da ai, Mali-N’Mai Zup hka madim hte seng ai ninghkap laika hpe, Miwa Hkringmang rung de daini sa jaw dat sai re.

New Delhi kaw na Miwa Sumtsan Salang Rung de, daini Gala ten hkying 1:30 daram hta, yawng a gawng malai hku na, ningbaw lahkawng sa jaw dat ai re lam, laika sa jaw ai ni Kachin News Group de tsun ai.

“Ndai hka madim galaw ai hpe J.W amyusha ni hku nna gara hku mung myit n hkrum lu ai majaw ninghkap tang shawn ai lam galaw sa wa ai lam rai nga ai,” nga nna, ndai laika sa jaw ai hta lawm ai, J.W Amyusha Hpung (KNO) malawm Andrewshin gaw, ndai ninghkap lamang galaw ai hte seng nna, sanglang dan ai.

Hka madim ninghkap laika hta, Miwa ga hku ka gele da ai laika hte English hku kada ai, madim hte seng nna, sanglang da ai laika ni lawm ai re lam, matut chye lu ai.

Mali Zup hka madim ninghkap ai lam hpe, mung kata nga myit rawt ai ni gaw, laika garan ai, shakum hkan tsi hte ka shakap ai, shamu shamawt lam ni hpe, galaw nga ai re.

Lai wa sai, January 18 hte 19 ya hta mung, KBC npu, Myitkyina Ginwang Hkalup Hpung woi awn ai hte, ginwang kata na buga hpung 59 gaw, hka madim masing hkring mat na matu, hkying hkum 24, lusha gam akyu hpyi lamang, rau sha galaw wa sai re.

“Jinghpaw amyusha ni a matu ndai hka madim gaw hpa akyu nga ai lam mung n nga ai, jahten shaza ai lam sha nga ai, Myen hpyen ni shanhte a akyu ara a matu sha re. Bai nna ndai Mali-N’mai Hka gaw Jinghpaw Wunpawng amyusha ni yu hkrat wa ai labau shang hka nu mung rai nga ai,” nga na hka madim masing hpe jahkring kau na matu ahkyak nga ai lam, Andrewshin matut tsun ai.

Malaysia mungdan daju Kuala Lumpur kaw nga ai, J.W Jawngma hte Ramma Hpung (AKSYU) kaw nna mung, Jinghpaw hte Myen mung na kaga bawsang amyusha 116 tup shanglawm ta masat galaw da ai, hka madim ninghkap laika hpe, Miwa Sumtsan Salang Rung de, lai wa sai January 26 ya shani sa jaw dat sai lam, dai wuhpung a lithkam Marip Gum Zet tsun ai.

“Ndai shara (Mali-N’mai) shara gaw, anhte Jinghpaw ni a matu Jiwe Jiwa ni jaw da ai labau shang shara re, dai hpe anhte makawp maga ra ai,” nga nna, Malaysia AKSYU rung lithkam Gum Zet bai tsun ai.

Shi matut tsun ai gaw, Miwa ni hku nna Jinghpaw mung hta hpabaw galaw mayu ai raitim, lamu ga, shara madu rai nga ai, Jinghpaw ni hte shawng bawngban ra na rai nna, ya na zawn Myen asuya hte sha jahkrup nna, galaw wa ai gaw, Jinghpaw ni hpe n gawn n sawn galaw ai ga mung rai nga ai nga, tsun ai.