Ndai mare-mungdan e du nga ai J.W ni marai 110 tup lata masat jawm htu tawn ai, Jinghpaw Mungdaw, Mali-N’Mai Zup e galaw nga ai, hka madim ninghkap laika pa hpe, dai mungdan e jung ai Miwa asuya Sumtsan Kasa Rung de, dai hpawt Singapore ten hkying 10 jan e, masha hkum nan sa jaw sai lam, woi awn ai ni tsun ai.Inglik hte Miwa laika, hpan lahkawng hku ka tawn ai, hka madim ninghkap ta masat gahkyin laika pa lahkawng hpe, Sumtsan Kasa Rung a Mung Masa hte Shiga Dap hte seng ai No. 2 Amumadu Slg. Cheng Hong Bo hpe, Singapore-Jinghpaw Laili Laika hte Htunghking Hpung (JLH) ningbaw lahkawng, sa jaw ai re lam, chye lu ai.
Ndai shamu shamawt lam hpe JLH-Singapore woi galaw ai rai nna, tinang nan Miwa kasa rung de sa du ninghkap laika jaw sai JLH amumadu Slg. Tangbau Awng Di, KNG de tsun ai gaw, “Hka madim hte seng nna, tsun dan ai shaloi, shi mau mat ai, shanhte galoi mung n na ga ai, ndai zawn laika lu la ai mung shawng na lang re nga tsun ai. Shi hku na n lu daw dan ya ai majaw, n-tsa de tang madun na she, bai shana wa na nga, an lahkawng hpe tsun ai”.
JLH ningbaw yan gaw, Mali Zup hka wanjak masing kaba hte seng nna byin wa na manghkang ni hpe, Slg. Cheng Hong Bo hpe hkying hkum mi ram mung, sanglang dan lu sai lam, Slg. Awng Di tsun ai.
“Miwa ni n mai na re nga jang, Myen hpyen asuya mung hkring na re. Hpa majaw nga yang, Miwa ni gaw Myen asuya n’tsa lu shaga ai, gumhpraw mung shanhte she lu ai,” nga nna mung Miwa asuya kasa rung de laika bang ai hte seng nna, Slg. Awng Di sanglang wa ai.
Ndai zawn hka madim ninghkap shamu shamawt lam woi galaw ai marang, Jinghpaw mungdaw kata na buga masha ni hpe lam maga mi hku, dang di dang dep ai daram garum ai ga mung re nga, shi matut tsun ai.
Bai, “Anhte ndai zawn galaw ai majaw, Miwa asuya kaw na mung, mungkan ting kaw na Jinghpaw ni ra sharawng ai hpe mu mada wa na, shanhte ni myit galai wa na re,” nga nna, shanhte myit mada da ai lam hpe JLH amumadu wa tsun ai.
January 19, lai wa sai bat lahkawng ya hta mung, United Kingdom, Inglik mungdan kaw du nga ai, Jinghpaw ni mung, Mali Zup madim ninghkap laika ni hpe, dai mungdan na Miwa asuya Sumtsan Kasa Rung de tang madun dat sai re.
Ndai hpe J.W Amyusha Hpung (KNO) woi galaw ai rai nna, shanhte matut nna, hka madim ninghkap shawa n-gun madun lamang hpe, UK, Japan hte Australia mungdan ni hta, 49 ning hpring Rawtmalan Nhtoi, du na February 5 ya shani, galaw na hkyen lajang nga ai lam, KNO salang ni tsun ai.
Myen-Miwa ga jarit e nga ai J.W Bawngring Mahkri Shawn Hpung (KDNG) a ningbaw, Slg. Awng Wa tsun ai gaw, mungkan ting kaw chyam bra nga ai, Jinghpaw ni, hka madim ninghkap ai lam hta shanglawm wa ai gaw, grai kaja ai lam rai nna, amyusha ni yawng shanglawm ninghkap ra sai re, nga ai.
