Kachin News Group - Kachin

Singapore na Miwa Sumtsan Salang Rung gaw, tinang rung de tang madun tawn ai Jinghpaw ni a Mali Zup madim ninghkap ‘ta masat gahkyin laika’ hpe seng ang ai ginjaw asuya ahkaw ahkang lu ni de shalai dat sai re.

Ndai lam hpe, Sumtsan Salang Rung a mung masa hte shiga dap lithkam No. 2 amumadu, Slg. Cheng Hong Bo a mana de Singapore ten hkying 5:16 pm ten, madim ninghkap lamang woi galaw ai ni de shiga shana ai email hte maren, chye lu ai.

“Nanhte a Myitsone hka madim hte seng ai laika pa hpe, anhte Miwa mung kata na, seng ang ai asuya ahkaw ahkang lu ni de sa dat ya sai,” nga nna, Mr.Cheng Hong Bo a email hta ka tawn ai lam, hka madim ninghkap lamang woi galaw ai, Singapore Jinghpaw Laili Laika hte Htunghking Hpung (JLH) a amumadu Slg. Aung Di tsun wa ai.

JLH-Singapore hpa-awn lahkawng gaw, ndai mare-mungdan kaw du nga ai J.W ni marai 110 tup shanglawm ta masat mahkret da ai, Mali-N’Mai Zup madim ninghkap laika pa hpe, lai wa sai January 28 ya hta, ndai Miwa Sumtsan Salang Rung na Mr. Cheng Hong Bo a lata kaw nan sa jaw da sai rai nga ai.

Gala mung, New Delhi-daju KNG shi htawn Solomon kawn daini ga-ang Mr.Cheng Hong Bo hte phone hku na, lu hkrum shaga wa tim, ndai lam hte seng nna, email hte mahtang ga san, ga htai galaw na nga, tsun wa sai re.

Ndai laika shalai ya ai hte seng nna, JLH amumadu Awng Di gaw ning nga tsun ai, “Anhte grai na kabu ai, n-gun mung lu ai, anhte galaw ai lam tang du wa na re ngu kam ai, ndai laika hpe yu nna, shanhte (Miwa) ni Jinghpaw ni hpyi shawn ai hpe mu mada wa na”.

Shawng e laika sa jaw ai ten, JLH ningbaw yan gaw, Slg. Cheng Hong Bo hte hkrum shaga ai shaloi, Mali Zup hka madim a majaw, buga masha mun lam hte madim lawu na mungmasha wan lam, lama n’nang nawn nawn nna hka madim daw ru wa yang, hka lim tsinyam tsindam kaba hkrum katut wa na re lam ni hpe tsun jahpra dan wa sai re.

Slg. Awng Di matut tsun ai gaw, shanhte hku nna, Miwa mung masha ni, ndai Mali Zup hka madim hte seng nna, grau chye na hkawn hkrang wa ai hte, ninghkap ai lam hta shanglawm wa na matu, Miwa shi laika ni hta, ndai lam hpe ka bang na matu, hkyen nga ai re nga ai.

“Miwa mung na mying kaba ai media hkan mung, Miwa hku ka gale da ai hka madim hte seng ai laika hpe, Miwa kaw nga ai manang ni a garum ai hte, ndai laika bang na matu hkyen nga ai,” nga nna Awng Di tsun ai.