Kachin News Group - Kachin

Myen hpyendap ni madu da ai, Jinghpaw mungdaw, KIO/A ginjaw ginra dingsa Nahpaw-Pajau Bum marawn ni hta, kani yi ni, Miwa amyusha ni hkrai sha san galaw wa hkra, dai shara e galik galai jung ai Myen dap ni hpajang nga ai lam, Nahpaw-Pajau shiga lawk tsun ai.

Ya ten, kani yi eka tsa lam hpe dai bum marawn ni hte dai shara jung ai Myen hpyendap a grupyin ni hta hkai tawn ai rai nna, sun madu ni gaw Jinghpaw mungdaw hte htingbu Miwa mungdan, Yunnan mungdaw na Miwa sut hpaga la (snr uhpung hku nna) 30 jan re lam, kani yi nchyang ni tsun ai.

Dai kani sun madu Miwa amyusha ni hta, nkau gaw, Hpakan, Nam San Yang, Miwa Laiza hte, htingbu Yunnan mungdaw na re lam, kani yi nchyang ni kawn lakap chye lu ai.

Myi-chyaw-mu buga ni, ndai laman, Kachin News Group de tsun shana sai hta, ya ten, dai shara na kani sun ni pu pu kabawng nga sai rai nna, du na February shata gaw, kani kadoi ten, “Kani Mangai Ta” re, nga ai.

Ndai bum gaw, Myen hpyendap a hpyen masa shawnglam ginra langai mung rai nna, dai shata hta shata masum snr mali hta kalang lang, dap dung galai gachyai lam galaw ai re.

Dai de shara sha-ang hkrum ai Myen dap shagu gaw, dai shara na kani sun madu yawng kaw kani kang hta lahkawn nga ai hta, shanhte jung ten ladaw mi a matu, Myen Kyat sen 40 kawn sen 150 lapran, hta lahkawn nga ai lam, dai shara Myen dap hte ni kahtep ai tsun ai.

Lai wa sai bat lahkawng ram hta sha, ndai shara de, Lt-Col Hkin Mawng Win woi awn ai Daw Hpum Yang Myen dap, Hka-La-Ya masat 142, galai gachyai du wa ai re.

Ya ten, ndai hpyendap hku nna, kani sun madu ni kaw hpyi tawn ai kani kang gaw, Myen Kyat sen 150 rai nna, dai gumhpraw hpe kani sun madu ni yawng jawm gahkyin let sa jaw na matu matsun tawn ai lam, kahtap chye lu ai.

Maning November shata, kani n’nan hkai hpang ai ten hta mung, dai ten na Myen dap, Namti daju Hka-Ma-Ya masat 382 mung, kani yi madu ni kaw Myen kyat sen kaba hta lahkawn la  wa sai re lam, kani sun madu ni hte ni htep ai ni tsun ai.

Raitim, kalang lang lahta tsang du ni dai shara de sa gawan na rai shagu, Myen dap gaw shi dap hte ni ai kani sun nkau hpe hkyen kau kau rai nhtawm, hpang e dai sun madu ni kaw gumhpraw bai hpyi ai majaw, jahten hkrum ai kani sun madu ni grai myit n pyaw nga ai lam, KNG sagawn chye lu ai.

Ndai Myen dap gaw, shawng de ndai bum marawn hku Miwa ga jarit hta hpun shalai dut an ai ten, hpun mawdaw ni kaw gumhpraw la sha wa sai raitim, ya hpun n lai mat sai majaw, dai shara hta gumhpraw lu ai Miwa ni hpe sha kani yi sa galaw na n-gun jaw nhtawm, ya na zawn kani kang hta sha nga ai re lam, ga jarit hpaga la ni tsun ai.

Maning December 14 ya shani shapraw ai, Mungkan Wunpawng Hpung a kani jep joi dap (UNODC) a sumtang laika hta, Myen mung e masum ning matut manoi kani sun law wa nna, KIO hte Wa gaw kani dut nhtawm sinat laknak mari ai lam, madi madun tawn ai re.

Dai hpe, ya ten, Myen hpyen dip n-gun jaw nga ai Border guard Force (Jarit Sin Dap) hpe n hkap la ai, KIO hte Wa gaw, dingdang tawn ai re.