Kachin News Group - Kachin

2010 ning a shawng n’nan lang hte 10 lang ngu na, Wunpawng Mungdan Shanglawt Hpung (KIO) hte Myen hpyen asuya salang ni lapran, jahkrup n mai ai Jarit Sin Dap (BGF) manghkang hpe mahtai tam shakut ai hku nna, mani, Jinghpaw mungdaw mare daju Myitkyina e bai hkrum sai re.

Zuphpawng hpe, Myitkyina-daju Myen a Dingdung Daw Daju (Ma Pa Hka) kata Mali Hka Yik-ta e, buga ten hkying 1 kawn 2 lapran, galaw wa sai lam, KIO shiga lawk hku chye lu ai.

Uhpung lahkawng lapran, KIO npu Wunpawng Mungdan Shanglawt Hpyendap (KIA) hpe Myen npu taw ai BGF gale hpaw ninghtan na hte seng nna, kaning rai jahkrup jahkrum mahtai tam wa sai hpe gaw, ya ten du hkra n chye lu shi ai.

Raitim, Jinghpaw mungdaw, Miwa ga jarit na KIO Laiza daju hku chye lu ai gaw, KIO gaw, ndai lang na zuphpawng hta gabaw n’nan n tang ai sha, shawng de hpyen asuya de tang madun tawn sai lam ni hpe sha, bai gram jahtuk nna tang madun na re, nga ai.

KIO tang madun sai lamyan kaba masum gaw--- tinang KIA dap hpe hpyen asuya npu n re ai, Kachin Regional Guard Force (KRGF) hku, mying galai nga na lam, snr dap galai na n jahta ai sha, uhpung lahkawng a mungshawa hte seng ai magam dap ni lapran, amu jawm galaw sa wa na lam hte, jahtum, Munghpawm Myen Mungdan byin wa ningpawt Panglong Ga Sadi myit jasat hte maren, mungmasa hkrang shapraw na, ra sharawng ai lam, tang madun sai re.

Ndai hpawng de, Myen de na, bawsang laknak hpai hpung hte seng ai Naypyitaw datkasa hte Tsa-Ya-Hpa (Hpyen masa Kaichyan Dap) lithkam Lat Du Daju Jum Ye Myint hte Ma-Pa-Hka dap-up Du Daju Soe Win yan shanglawm ai re.

Bai KIO salang ni hta, ningbaw kaba Lanyaw Zawng Hra, tingnyang-up Malai 1 Lat Du Daju Jum Gauri Zau Seng, tau Dap Awng Daju Du Up Daju Sumlut Gun Maw hte kaga ginjaw salang ni shanglawm ai lam, KIO shiga lawk hku matut chye lu ai.

Ndai lang na zuphpawng hta, KIO ninggawn amumadu Dr. Lahkyen La Ja gaw ahkun la da ai majaw, n shang lawm ai lam, KIO salang ni hpe lakap let chye lu ai.

Maning, December 29 ya, uhpung lahkawng salang ni Ma-Pa-Hka e hkrum shaga ai hta, Jinghpaw mungdaw Dap-up (snr. taimu) Du Daju Soe Win gaw, “Panglong Ga Sadi prat htum mat sai, jahten kau sai” ngu nna, KIO a Panglong myit jasat tang madun lam hpe saw lasawn di n hkap la ya sai lam, KIO salang ni hpe lakap let chye lu ai.

Ndai ten, ya ten, KIO/A a daru magam kaba dik, Ningbaw malai Lat Du Daju Jum N’ban La Awng gaw, Yangon de tsi jep sa ai bat mi jan na wa sai kaw na, tinang Laiza daju de n du wa shi ai lam, Laiza shiga lawk hku chye lu ai.