Kachin News Group - Kachin

Myen gaw, lama Wa hte Jinghpaw hpe gasat yang hpyen masa ahkyak ai shara, shi zing madu tawn ai lahta Sam mung Kokang ginra de hpyen n-gun bai, jat bang sai re.

Lai wa sai January 8 ya shani, hpyen mawdaw 30 jan hte, Saphkung Hka a sinpraw hkran, Kokang snr Myanmar National Democratic Alliance Army (MNDAA) ginra de, hpyen n-gun tsa kaba htu tawn sai hta, dai hpyen hpung ni ya ten du hkra n bai wa shi ai lam, kam ging ai buga shiga lawk langai tsun ai.

Ndai hpyendap gaw, Meiktila-daju Dap Nawng (LID) masat 99 rai nna, hpyen n-gun 1,000 mi jan lawm na hpe na myi-chyaw-sakse ni, sawn maram tan ai re.

Lamu ga ginra hku nna, Kokang ginra gaw, Wunpawng Mungdan Shanglawt Hpyendap (KIA) a dap ba 4 hte United Wa State Army (UWSA) lapran nga ai majaw, ya Myen a Jarit Sin Dap (BGF) hpe n hkap la ai, Wa hte KIA a matu matut mahkai lam ahkyak ai shara rai nga ai.

Hpyen masa yu gawn ai ni tsun ai hta, ndai Myen a Kokang de hpyen n-gun n’nan htu tawn ai sat lawat gaw, madung, Wa hte Loikang-daju KIA dap ba 4 a matut mahkai lam hpe, tau dan di ai lachyum re, nga ai.

Raitim, KIA dap ba 4 na lahta tsang hpyendu langai tsun ai gaw, ya hprawng lawt nga ai Kokang ningbaw Peng Jiasheng a lai wa sai shata lahkawng jan e ndau shabra dat ai shiga a majaw, ya na zawn Myen hpyen ni htu wa ai rai na re, nga ai.

Kokang ningbaw wa a ndau hta, “Shi hkum nan ndai February shata ang ai Miwa Shaning Ningnan poi hpe Myen hpyen de hkrat sum mat ai, shi a Laogai (snr. Laukai) daju e sa galaw na re” ngu, ndau shabra da ai lam, chye lu ai.

Maning August shata 24 hta, Myen gaw Kokang hte galaw ai simsa lam ga sadi hpe tinang hku shawng jahten nhtawm, Kokang ginjaw Laogai hte kaga uphkang ginra yawng hpe ma ja gasat zing la sai re.

Ndai majan a majaw, Kokang ginra na, madung Kokang Miwa amyusha 35,000 jan gaw Miwa ga jarit mare Nansan de tsin-yam masha hku hprawng de mat sai re.

Maning na April shata kawn Myen gaw KIO/KIA hte dingyang jahkrup jahkrum lam galaw nga tim, n-gun grau kaba ai Wa hte gaw dai zawn n galaw ai.

Lai wa sai January 29 ya hta mung, Myen hte KIO lapran, 10 lang ngu na hkrum shaga ai lam hpe, Jinghpaw mungdaw mare daju Myitkyina e galaw sai re.

Bai, maga mi de mung, ya ten Myen hpyen ni hpe Wa ginra grup gra de n’gun jat htu tawn tim, dai zawn, Wa hte hpyen masa myit hkrum tawn ai KIO/A ginra de n galaw ai lam, KNG sagawn chye lu ai.