Myen hpyen asuya hte Wunpawng Mungdan Shanglawt Hpung (KIO) lapran, shada bawngban jahkrup jahkrum ai lam lang hte lang galaw lu tim, mahtai kaja n pru hkraw ai majaw, bai gap hkap ra na masa de shanawng wa nga sai lam, chye lu ai.
KIO kata e shada jahkrup lam tam nga dingyang re zawn, Laiza daju e gaw, buga masha ni hpe "tau arung arai zupzi baw shangun da ai hte sadi maja let nga matu" tsun shana wa sai lam, buga masha langai tsun dan wa ai.
"Mai Ja Yang kaw gaw, mungmasha ni hkrit mat na tsang na ngu na kun, hpa n tsang ra ai, hpa majan n byin na re'nga na, seng ang ai KIO uphkang salang ni tsun ai le. Dai majaw, nang kaw gaw grai zim ai" nga, Mai Ja Yang buga masha langai tsun wa ai.
Raitim, radio shiga madat ai, buga masha ni gaw, sadi maja let tsang ai hpe mu lu ai lam matut tsun dan wa ai.
Dai hta, Myen hte KIO jahkrup jahkrum hpang wa ai kaw nna, ya ten hta, Shanglawt (KIO) uphkang ginra hta e Myen hpyendap a kinyu yu ai masha ni, pru pru shang shang galaw ai hpe mu lu ai lam, KIO shiga lawk kawn chye lu ai.
"Myen hpyendap ni, Manmaw lam mayan hkan hpyen n-gun jahkrat ai kaw nna, anhte buga hta, Myen, Sam, Gala chyasam masha ni hpaga ga ai nga na, grai shang wa ma ai" nga, Laiza buga masha langai tsun wa ai re.
Myen hpyen asuya gaw, shi matsun tawn ai, "Ga Jarit Sin Hpyendap" hpe n hkap la ai, Lahta Sam mung na, ningbaw Hpung Chya Shin (Peng Jiasheng) woi awn ai, Kokang simsa lam hpung hte mani kaw na gasat hpang wa sai, rai nga ai.
Bai nna, Kokang simlam hpung gaw, daini August 26 hte ndau laika shapraw ai hta, ndai shata 20 ya a hpang Kokang ginra de jat bang ai Myen hpyen n-gun hpe nhtang dawm kau ya na hte uhpung lahkawng lapran simsa lam hpe matut shagrin na lam ni hpe, ndau hta tang madun wa sai re.
August 24 ya shana hta, Kokang daju Laogai hpe pyada hking hpun ai Myen hpyenla ni, 'sinat pala mi' n kapaw ai sha, shang zing tawn ai hte, ya ten, Myen hpyen n-gun 3,000 ram du wa sai lam, Kokang shiga lawk kawn chye lu ai.
Lai wa sai bat lahkawng jan hta mung, Hpakan Uru Sengmaw Ga e Myen hte Shanglawt lapran ganoi noi gap hkat wa sai re.
Dai re majaw, ya ten, KIO/KIA kata e mung, Kokang daju hype Myen ni sa zing madu la ai zawn n byin hkra, sadi maja let nga nga ai lam, KNG kawn sagawn chye lu ai.
Maga mi de, Jinghpaw Mungdaw hte Lahta Sam mung na tinang KIA dap ni yawng hpe mung, tinang gaiwang de laklak lailai shang wa ai Myen hpyen ni gap na matu, matsun tawn sai re.
| Comments |
|
|
|||||||||||
|
|||||||||||
|
|||||||||||
Powered by !JoomlaComment 3.26
