Kachin News Group - Kachin

Gala mungdan mare daju New Delhi kaw du nga ai, J.W amyusha ni hte, Myen mung na kaga bawsang amyusha ni shanglawm let, 49 ning hpring KIA Rawtmalan Nhtoi masat hpe mani February 5 ya hta, n-gun madun poi hte rau galaw wa sai re.

J.W Amyusha Hpung (KNO) kawn woi awn zinlum ai hte, masha n-gun 50 jan gaw, New Delhi kaw nga ai, Jantar Mantar shara e Wunpawng Mungdan Shanglawt Hpyendap (KIA) a 1961, February 5 kawn hpang ai, Rawtmalan ai 49 ning hpring masat nhtoi lamang hpe, n-gun madun ai hte galaw wa ai re.

N-gun madun lamang hta, Myen hpyen asuya a majaw Jinghpaw mung kaw byin nga ai, zing ri zing rat ai lam ni, dip lu dip sha roi rip ai lam ni hte Mali Zup hka madim masing hpe jahkring kau ya na matu, hpyi jahtau wa sai hte, Myen mung democracy ningbaw Slg. Awng San Su Chyi hpe, dat ya na matu mung hpyi shawn wa sai re.

“1961 ning kawn Jinghpaw amyusha ni gaw, myusha ni lawt lu na matu gasat hpawng sai re. Dai ni, Jinghpaw ni kaw, laknak lang hpung 5 nga ai raitim, 2 sha ngam sai,” nga nna, KNO malawm Andreshin gaw, ndai n-gun madun ai lamang hta, tsun ai.

KIA hpe 1961 ning, lahta Sam Mung, Lashio mare makau hpaw hpang wa sai rai nna, 1968 ning hta gaw, Zahkung Ting Ying woi awn ai hpung shawng ga garan mat nna, New Democratic Army-Kachin (NDA-K) hpe hpaw hpang sai re. Dai hpang, Mahtu Naw woi awn ai wuhpung 1990 ning hta ga garan nna, Jinghpaw Makawp Maga Dap (KDA) hpe hpaw dat sai re.

2004 ning hta gaw, Lasang Awng Wa woi awn ai, simsa lam hpung hku nna, hpang jahtum , kanu KIA kawn ga garan pru wa ai re.

Myen hpyen asuya a, dip n-gun jaw ai hte rau, NDA-K gaw, Myen hpyendap npu taw ai Jarit Sin Dap (BGF) de gale sai hte, Lawa Yang hte Gwi Htu kaw daju ai, Lasang Awng Wa Simsa Lam Hpung gaw, N’gawn Hpyen de gale sai re.

KIO mung Myen asuya a BGF de gale na matu matut nna, dip n-gun jaw hkrum nga ai hte, wuhpung lahkawng a lapran laiwa sai shaning April shata kawn, 10 lang tup bawngban jahkrum  wa sai raitim, hpa mahtai n pru ai re.

“Anhte Myen mung kaw nga ai myusha ni yawng, shinggyim ahkaw ahkang hte awm dawm ahkaw ahkang lu na matu matut galaw shakut ra ai,” nga nna, 1999 hta hpaw hpang ai, KNO malawm, Andrewshin tsun ai.

Gala mung kata na KIO mung laksan lamang hku nna, Rawtmalan Nhtoi masat lamang hpe, shana de, Gala ten hkying 4 kawn hkying 5 jan du hkra galaw ai hta, New Delhi kaw shanu nga ai, Jinghpaw amyusha 30 jan sa du lawm sai.