Slg. Vijay Nambiar
Category: Shiga

Laiza hkrumra hpawng masum ya ngu na shani UN hte Miwa ni du

Amyu sha rawt malan hpung ni a masum ya ngu na Laiza hkrumra hpawng de Mungkan Wunpawng Hpung (UN) kawn dat kasa Slg. Vijay Nambiar hte Miwa Gumsan Mungdan na dat kasa ni du wa ai lam Wunpawng Mungdan Shanglawt Hpung (KIO) Mungching Uphkang Dap na Salang Kaba Labang Doi Pyi Sa tsun ai.

KNG TV

ATEN DU SAI

Masa amyu myu hta hkan nna anhte Wunpawng Myusha ni gaw nat jaw jau nhtawm tinang a dai daw buga hkan na mung-up du ni a npu kaw nga pra wa saga ai. Karai Kasang a lam madun dat ai marang e American Sasana ni anhte a ginra de du nna machye machyang amyu myu shatsam ya masai.

Wunpawng Myusha ni rawt jat wa nga ai hpe hpyen wa a matu myit tsang hpa rai wa ai majaw makam masham lam, amyu htunghking lam, mungmasa lam, hpyen masa lam zawn re ai ni hpe jahten sharun kau ya wa sai. Shing re ai masa hta hkan nna Wunpawng Myusha ni gaw tinang a myusha ni hpe makawp maga lu na matu hpyen hpung hpe shazeng wa ai hta n-ga, hpu nau nkau gaw mungkan kaw chyam bra wa nna tam lu tam sha wa ai hkrun lam hta hpaji ningmu ni mung dam lada wa masai.
nau_shawng_jinghpaw
Hpyen wa gaw Wunpawng sha ni rawt jat wa ai hpe aten dep shamyit kau lu na matu mahkrun amyu myu tam wa ai rai yang, ndai ten hta hpyen masa hpe madung tawn nhtawm Wunpawng mungdan hte myusha ni hpe jahten sharun bang wa nga masai. Anhte gaw kaga ten ni hta shada myit dun hkat ai lam hta n dum shamyi nga lai wa saga ai raitim, ndai zawn re ai myusha lam yan hta myit tsang hpa mu wa ai hte Israel myu sha ni zawn gade tsan ai mungdan hkan nga timung, myit tsang myit kahpra ai hte byin mai ai shara langai ngai kaw shang tsap nna myusha lam yan hta hkum dek shang lawm ap nawng ai lam galaw wa nga sai. Wunpawng Mungdan gaw tut nawng e maden zinghkra sa wa lu na re, ngu ai hpe asan sha kasi kumla madun ai rai sai.

ATEN DU SAI. Mungdan kata na hpu nau ni sha n-ga, maigan hkan du nga ai myutsaw sha ni hkum shagu gaw tinang dang dep ai shara kaw shang tsap nhtawm, mungmasa lam, hpyen masa lam, myit masa lam, ja gumhpraw lam, ndau shabra ai lam yan amyu myu hta shang lawm nga masai hpe mu chye lu ai. Maigan mungdan kaw du nga ai myutsaw hpu nau langai tsun ai hta:- “Ngai lu ai shata shabrai gaw n law n la sha re. Raitim, shata shagu pala 10 mari lu na matu sha pyi gaw shang lawm sai” nga nna ta tut shadik shatup nu ai. Awngdang lam shu la lu na matu na chying myit n-gun lu ai ten rai sai, ngu nna hkam la ai.

KIO Ginjaw kaw daw dan ai shiga mung na lu ai. Rawt malan hpang ai 1961 February 5 ya shani kaw nna dai ni du hkra tai hpyen ni hte bawngban myit hkrum wa ai gade lang rai sai hpe pyi hti n dang sai. N-gup aga hte sadi tawn ai, laili laika hte ta masat sadi tawn ai ni hpe KIO maga hku nna tup hkrak sadi dung wa sai raitim hpyen ni hku nna kalang sha pyi sadi n dung yu ai hpe mu wa saga ai. Tawn da ai sadi hpe hkying hkum laman, nhtoi laman, snr shata laman kaw jahten sharun wa masai.

Shing re ai majaw, du na ra ai ten ni hta tai hpyen hte bawngban ga sadi tawn hkat na matu gaw, hpu nau rawt malan mungdaw yawng lawm ai United Nationalities Federal Council (UNFC) hku nna shaga na. Tara hpe shadik shatup ya lu na mungdan langai ngai, shing nrai mungkan uhpung langai ngai lapran kaw shang tsap hparan ya ai hpe sha hkap la na, ngu ai hpe myit hkrum daw dan masai lam na chye lu ai.