KNU ningbaw Mutu Say Poe
Category: Shiga

UNFC hpung shang kawn KNU gan le mat ai lam hpe matut hkangzing na

Amyu Sha Hpyen Masa Mungmasa Daphpawm (UNFC) hpung kawn Kayin Amyu Sha Hpung (KNU) le wa ai lam hpe matut hkangzing mat na lam hpe 6 ya tup galaw ai ginjaw dinggrin komiti zuphpawng kawn dawdan dat ai.

KNG TV

Jinghpaw mungdaw a mabyin ni - 2008

Jinghpaw mungdaw a mabyin ni-2008


J.W Chyum Dakkasu Lungseng Jubile (1932-2007)

Jinghpaw Wunpawng (J.W) Hkalup Hpung Ginjaw (KBC snr JHZ) gaw J.W Hkalup hpung masha ni chyum jawng lu la ai 75 ning hpring ai lungseng jubili Karai Kasang chyeju shakawn poi kaba hpe J.W Chyum Dakkasu (KTC) jawng wang, Jinghpaw Mungdaw a mare daju kaba Myitkyina mare a dingdung de deng 10 tsan ai Nawng Nang ninghtawn e galaw wa sai.

Teng nga yang, J.W Hkalup Hpung masha ni chyum jawng lu la ai Lungseng Jubilee gaw 2007 hta ang ai raitim, lungseng jubili chyeju shakawn hpawng kaba hpe March 24-30 laman, '2008 ning jawng yu poi' hte arau hpawn galaw wa sai.

1932 kaw nna 2007 ning du hkra sharin jahpat dat ai jawngma yawng gaw 3,817 rai nna, dai hta ala yawng 2,220  hte anum 1,597 rai sai lam, KTC labau kyem mazing kawn chye lu ai.

KTC gaw ya aten jawngma yawng 480 jan rai nna aten hpring hte hpung jat chyum hpaji sharin nga ai jawng sara/num ni yawng marai 30 jan rai nga ai. Ya, KTC hta Licentiate Theology (L.Th.), Bachelor of Theology (B.Th.), Bachelor of Ministry (B.Min.), Master of Divinity
(M.Dip.) degree pang ni hte shagrau nga ai. Ndai jubili hpawng kaba kaw nna Honorary Doctorate or Doctor of Divinity (D.D.) shagrau ya ai lam mung galaw hpang wa sai.

Ndai sanit ya galaw ai Lungseng jubili chyeju shakawn hpawng kaba hta, hpung masha ni 20,000 jan mying jahpan bang shanglawm wa sai hte poi sa manam gaw sen 2 daram rai nga ai lam, chye lu ai. Ndai hpawng kaba hta Myen gumhpraw lap wan 86 jan jai lang wa sai.

KTC gaw Hkalup hpung masha sen 4 jan hpe gawng malai tai ai Jinghpaw Wunpawng Hkalup Hpung Ginjaw a kaba dik ai chyum jawng rai nna Myen mungdan hta kaba dik ai chyum jawng langai rai nga ai.

J.W Hkalup Ramma Hpawng Kaba (April 5-11)

Myen mung shang wang, J.W Hkalup Ginjaw (JHZ) na J.W Hkalup ramma shawa 3,000 jan gaw Shanglawt Uphkang ai ginra Nbapa, Miwa-Jinghpaw mung jarit e 7 lang na Hkalup ramma shawa hpawng hpe awngdang ai hte galaw wa sai.

Nbapa na Hkalup ramma shawa hpawng gabaw gaw Buhkaw laika 14:9b na," ... Hkum hkrit myit, Yehowa nga nga ai," ngu ai rai nga ai. Ndai zawn re Hkalup ramma shawa zuphpawng kaba gaw 5 ning hta kalang lang galaw ai zuphpawng rai nga ai.

Laklai ai lam gaw, ndai Nbapa na J.W Hkalup Hkristan Ramma Shawa Zuphpawng Kaba gaw hpyen asuya ju up magam ni galaw na ndat da ai mungdan ting Shanhte woi ka jahkrat da ai mungdan a 'Ningpawt Ninghpang Gaw Da Ai Tara Kanu' hpe shawa ra masat hkam hpawng (constitutional referendum) galaw na shata mi hta galaw ai re.

J.W jawngma ni Referedum ninghkap laika pa shakap (Jan - May)

Myen gumshem hpyen asuya ara ka da ai mungdan a Ningpawt Ninghpang Gaw Da Ai Rara Kanu (nhprang) hpe shawa ara masat hkam la hpawng May 10 ya a shawng kaw nna Jinghpaw Mungdaw Jawngma Hpung (All Kachin Students' Union, AKSU) malawm ni gaw Jinghpaw Mungdaw kata rudi nna kata lam shamu shamawt nga ai ramma hpung rai nga ai hte maren, referendum hpe ja ja ninghkap ai "NO" laika pa shakap ai campaign ni hpe alang lang galaw wa sai.

Ndai referendum ninghkap laika pa shakap ai campaign ni hpe Jinghpaw Mung na marae kaba hte daju rai nga ai Myitkyina, numbat lahkawng mare daju Manmaw hte kaga Waimaw, Namti hte Mugawng mare kaba ni hta adan aleng shadan shadawng dan wa sai, rai nga ai.

KIO gaw, 'shawa ndau ga sadi' sharun nna Myen a Referendum hpe madi shadaw

Mungdan kata laknak hpai Rawtmalan Wuhpung ni hta n-gun kaba dik gap hkat jahkring hpung, Wunpawng Mungdan Shanglawt Hpung (KIO) gaw, tinang dapshawa mungshawa ndau tawn ai, Myen hpyen asuya ka ai 'mungdan a ningpawt ninghpang gaw da ai tara kanu ntsa, shawa ara hkam la poi (referendum) galaw ai hta, lapran tsap na masa' tawn da ai hpe akajawng sharun kau nhtawm, KIO/KIA masha hte KIO kata na mungmasha ni hpe Referendum de madi shadaw ai 'Sindan Pa (me)' jaw na matu, aming jaw wa sai.

Referendum du na masum ya sha ra ai May 7 ya sha ni hta KIO gaw, tinang a uphkang ginra yawng na dapshawa mungmasha yawng de 'referendum hpe madi shadaw na lam aming' htuk shabra wa sai, rai nga ai. Ndai zawn galaw wa ai lam gaw, Myen a Dingdung Daw Dap-up (Northern Command commander snr Taimu) dingsa Maj-Gen Ong Myit gaw, KIO ginjaw Laiza de hpyen n-gun, laknak n-gun, tank mawdaw ni hpring hte 'majan gasat na zawn' sa jahkrit ai majaw rai nga ai.

Bai nna, kaga Jinghpaw mungdaw kata na Jinghpaw laknak lang wuhpung kaji rai nga ai, New Democratic Army-Kachin (NDA-K) and Lasang Awng Wa Simsa Lam Hpung ni hte Lahta Sam mung na Kachin Defense Army (KDA) ni mung, KIO hte maren, hpyen asuya a mungdan a gawda ai tara nhprang hpe madi shadaw me jaw na matu, tinang a dapshawa mungshawa ni hpe aming jaw wa sai re.

Brig-Gen Soe Win hpe Ma Pa Hka dap-up n'nan hku shara galai bang (June)

Myen Brig-Gen Soe Win, Mandalay Ginwang, Pyin Oo Lwin (Memyu) na Hpyendu Jawng, jawng-up hpe Jinghpaw mungdaw mare daju Myitkyina e jung ai, Dingdung Daw Hpyendap Daju (Ma Pa Hka) a dap-up (taimu) hku nna shara galai bang wa sai.

Dap-up Soe Win gaw shi a uphkang ai aten laman, Jinghpaw Mungdaw kata kani nanghpam tsi mawan ni hpe ru kawn shagrawt jasan kau na re lam, ga sadi jaw wa sai. Raitim, shi gaw Jinghpaw mungdaw kata na hpun mailung ni, Miwa ga jarit de htaw shalai dut ai hpaga bungli hpe gaw, tara shang ahkang jaw wa sai.

Nhkum Hkawn Din gaw Myen hpyenla ni a jawm roi rip sat hkrum (July 27)

Asak 15 ning jan sha re ai Jinghpaw Hkristan Jawngnum sha Nhkum Hkawn Din, Manmaw, Namsai kahtawng, laika tsang matsat jawngnum gaw, July shata 27 ya shani, Myen hpyenla ni a jawm roi rip sat hkrum wa sai.

Shayi Hkawn Din gaw mare makau hkauna na kahpu ba hpe malu masha jarik sa gun jaw ai lam lapran, N'mawk Myen hpyendap, Lagaw Lawan Dap (Light Infantry Battalion), Hka Ma Ya masat 437 na hpyenla marai masum a jawm shinggyim roi rip sat kau hkrum sai.

Hkawn Din roi rip sat ai mabyin hta Hka Ma Ya masat 437 na hpyenla yawm dik marai 3 lawm ai raitim, ya ten du hkra, Myen hpyen asuya gaw, sai n grin ai zawn re ai, 'Soe Tu Win' ngu ai hpyenma hpe sha, ahkyak la, hkyuk sharawng tawn ai, rai nga ai.

Miwa ni Jinghpaw mungdaw na hpun bai shawn bang wa

Aten tsawm ra hkrawn ai hpang, Miwa hpun lauban ni gaw November shata kawn Jinghpaw mungdaw na hpun mailung ni hpe tinang mungdan de bai shawn bang wa sai.

Ya, Miwa ga de madung htaw shalai bang ai hpun ni gaw, Manmaw gaiwang hte Mali-N'mai Walawng na hpunja hpunkya ni, rai nga ai. Ndai lang na sawng dik gaw, Miwa ni gaw mungmasha ni madat tawn ai, kawn tawn ai hpun maling ni n lata, kran shaw la nga ai re lam, chye lu ai.

Kaja wa nga yang, Miwa asuya gaw Myen mung dingdung daw na hpun mailung ni hpe n shawn bang na lam, lai wa sai 2005 ning htum wa de, tara shang pat hkum wa sai re. Raitim, dai zawn galaw ai hpang mung, Miwa ga de Jinghpaw mungdaw hpun mailung ni, n dut n dang, dingyang naw shawn bang nga ai, rai nga ai.

Myen-Miwa ga jarit hta, Miwa ni 'Laiza Bunghku' shachyaw hpang

2008, November shata praw kawn Miwa asuya gaw, dam de pe 10 hte galu de deng sanit jan ai, Myen-Miwa ga jarit madin, "Laiza Bunghku" hpe, Jinghpaw mungdaw, KIO a ginjaw Laiza e galaw hpang wa sai.

Ndai 'bunghku' gaw, Laiza Hka hte madin din tawn ai, Miwa Laiza hte KIO Laiza hpe madung madin din pat kau ya ai lam, rai nga ai.

Miwa gaw ndai bunghku hpe, "Myen mung hkran na kani nanghpam tsi mawan ni, Miwa de lagu shalai bang ai lam hpe pat shingdang lu na yaw shada ai re' nga nna, ginlam jaw tawn wa sai.

Myen-Miwa ga jarit hta, masha ginlen dut ninghkap rung hpaw (December 22)

Myen, Miwa asuya lahkawng na mungdan gawng malai pyada du ni gaw, Jinghpaw mungdaw hte matut ai mungdan lahkawng a lamu ga jarit n'tsa 'masha ginlen dut ninghkap rung lahkawng' hpe December 22 ya shani, tara shang hpaw dat sai.

Rung mying hpe 'Myanmar-China Border Liaison Office On Anti trafficking in Persons' ngu ai gabaw jaw tawn ai rai nna, dai rung ni hpe, Miwa ga jarit hkran de Jang Hkong hte Myen ga jarit maga gaw Loije kaw hpaw tawn ai, rai nga ai.

Ndai rung lahkawng hpaw poi de Myen hpyen asuya a pyada du daju Brig-Gen Khin Yi (Khin Yee) hte Miwa ginjaw asuya na lahta tsang pyada du kaba langai sa du lawm sai.

Jinghpaw ni Amerikan Hkalup Sasana 100 ning hpring 'jaw poi' galaw (Feb. 3, 1909- Feb. 3, 2009)

Myen mung a dingdung daw, Jinghpaw mungdaw, J.W Hkalup Hpung Ginjaw npu Manmaw Ginwang na Loije Pa hta, Wing Hkam mare Hkalup Hpung a Amerikan Hkalup Sasana shang 100 ning jaw poi hpe December 29-31 laman, wu wu di di galaw wa sai.

Ndai poi hta, Wing Hkam (Win Hkam) mare de wa ai, Hkalup Sasana shang wa ai hte laika hpaji jawng lu ai lamang ni hpe kapyawn galaw wa sai, rai nga ai.  Shawng n'nan ndai lam ni hpe ningpawt hpang ya sai kanu kawa ni gaw, Amerikan shan hpraw Hkalup Sasana sara kaba Rev. H.J. Robert hte jauman Jinghpaw sasana sara Rev. Damau Naw ni rai nga ai.

Jaw Karai chyeju shakawn hpawng hta Wing Hkam Hkalup hpungmasha marai 200 jan hte manam ni yawng marai 400 jan shanglawm let, "Jaw Wunli Manau" hpe mung, December 30 hte 31, lahkawng ya tup nau la lu sai. Dai manau gaw, Wing Hkam mare a shawng ningnan na manau mung, rai nga ai.

Bai, Jaw Poi a masat dingsat hku nna '100 hpring masat Gawknu hte Sasana Sara ni a masat dingsat Lungpa' ni hpe mung, galaw la lu sai.  Ndai 'Jaw Poi' hpe shata lahkawng jau nna galaw ai lam mung, rai nga ai.