Hkrisamat Kumhpa

Hkrisamat-kumhpa
“Dai ni na nhtoi hta Hkye hkrang la ai wa Hkristu ngu ai Madu gaw, Dawi a mare e nanhte a matu shangai wa sai:” (Luka 2:11).
Ga Nhpaw:

Shawng nnan, Karai Kasang a chyeju hpe shakawn ai. Nu wa hpu nau ni yawng hpe ‘Happy X’mas’ ‘Merry X’mas’ ngu shawng nnan shakram dat nngai. 2013 ning gaw, kade nna yang lai mat wa sana re. 2013 ning hpe lai di wa ai shaloi, anhte langai hte langai byin hkrum hkra ai lam ni gaw n bung na re. Nkau mi pyaw ai zawn, nkau mi jam jau hkrum na re. Nkau mi kabu lu ai zawn, nkau mi yawn hkyen myi prwi pru ai ten mung nga sana re. Nkau mi awng dang ai lam lu la ai zawn, nkau mi hkrat sum ai lam mung nga na re. Nkau mi mai kaja ai sak hkrung lam hta hkawm sa lu ai zawn, nkau mi yubak galaw kau hkrup ai ni mung nga sana re. Chyum Laika hta tsun ai gaw, dai zawn re shinggyim masha ni yawng hpe Hkye hkrang la ai wa Hkristu ngu ai Madu gaw Bethlehem mare na wushat wakang hta shangai wa sai lam tsun da nga ai. Dai majaw, yawng a matu myit mada shara, kabu hpa shiga (Hkrisamat Kumhpa kaba) Yesu Hkristu la sa ya sai hpe myit dum let, ndai Hkrisamat aten hta mungga hku nna n-gun jawm la ga ngu ga saw mayu nngai.

1. Hkye hkrang la ai wa Hkristu ngu ai Madu shangai sai (Luka 2:11)

Yesu Hkristu shangai wa ai gaw, shinggyim masha ni a matu nachying kabu gara mai ai shiga kumhpa re lam (Luka 2:10) hta tsun da nga ai. Hpa majaw rai ta? Yubak mara hta lup mat wa sai shinggyim masha ni hpe hkye shalawt la lu na matu, Madu Yesu Hkristu hku nna sha nrai yang, shinggyim masha ni a yubak mara hpe raw dat kau ya lu na lam mi n-nga mat sai. Dai zawn re kaw na anhte hpe hkye la na matu Madu Yesu Hkristu shangai wa ai re majaw, anhte yawng a matu kabu hpa shiga kumhpa nan rai nga ai. Yesu Hkristu a majaw shinggyim masha ni bai hpring tsup wa lu na chyeju hkrun lam hpe bai lu la sai rai nga ai.

Madu Yesu Hkristu gaw, Karai Kasang nan re majaw, Shi a shangai chyinghkai ai lam mung, shinggyim masha ni a shangai chyinghkai ai lam hte n bung nga ai. Chyoi pra ai lam gaw, Hkawn sek Mari kaw e na-um na-sin byin nna Chyoi pra ai hte shangai wa ai re lam (Esai 7:14; Mahte 1:22-23) hta tsun da nga ai. Dai majaw, Madu Yesu Hkristu gaw, Karai Kasang nan rai nna shinggyim masha ni hpe hkye shalawt la na matu shangai wa sai re lam hpe kam shut shara n-nga ai; asan sha kam sham mai nga ai law.

2. Hkristu ngu ai Madu gaw, anhte hte rau re “Emanuela” (Yawhan 1:14; Mahte 1:22-23)

Myi hte n-mu lu ai, jum tek da n-lu ai Karai Kasang gaw, myi hte mu lu ai, jum tek da lu ai shinggyim masha Yesu Hkristu tai wa sai re. Shinggyim hkum hkrang dagraw la ai Karai Kasang hpe “Mungga” ngu nna mung, “Emanuela” ngu nna mung (Yawhan 1:14; Mahte 1:22-23) hta tsun da nga ai. “Emanuela” ngu ai lachyum gaw, “Karai Kasang anhte hte rau rai nga ai” ngu ai lachyum re. Teng nga ai. Karai Kasang anhte hte rau rai nga ai lam gaw, 2011 ning June Shata praw (9) ya shani kaw nna byin ai lahkawng ning laman na majan hta sakse law law wa mu lu saga ai. Myitsu langai sakse hkam ai hta, “Karai Kasang anhte hte rau nga ai lam hpe chye na ai gaw, Israela amyu ni hte anhte Kachin amyu ni rai na sai”, nga ai. Teng na re. Hpa majaw nga yang, lawu ga na hpu nau nkau mi hte mungkan masha law law wa, ndai majan hpe mau ma ai. Hpyen yen tsin yam hkrum ai hpu nau ni shing san ai hpe gara hku jaw sha ma ta? Shing san ai asuya hpyen dap, la ba ga-up lung wa ai tat ma ni hpe kaning di ninghkap gasat lu ma ta? Mare nawng nawng nat kau hkrum ai, jahten kau hkrum ai, ratim, hprawng yen lu ma ai. Hpa majaw rai ta? Pat da hkrum ai lam law law kaw na, Kachin ni a lam hpe mungkan de shabrawng dan lu ma ai. Hpa majaw rai ta? Ga san ni... Ga san ni...law law wa san let mau nga ma ai. Hkristu ngu ai Madu gaw anhte hte rau nga nga ai, ngu hpe n chye na ai hpu nau ni a matu gaw, ga san law law hte mau hpa lam hkrai rai na re. Raitim, Karai Kasang hpe kam sham ai Hkristan hpung masha ni a matu gaw, mau hpa n-re. Pyaw tim, yak tim, tsin yam kata hta raitim, chyeju shakawn na lam hkrai rai nga ai. “Emanuela” ngu ai Hkristu Yesu anhte hte rau nga nga ai majaw, asuya hpyen dap la ba hte shamyit shatsai kau na majan masing kata kaw na Karai Kasang hkye shalawt la ai lam rai nga ai. Chyum Laika (Yawhan 3:16) hta, Karai Kasang a Kasha hpe kam sham ai ni nlang hte hpe, hten byak n-jahkrum na re lam tsun da sai. Luka 2:14 hta mung, Karai Kasang sharawng awng ai masha ni hta, ngwi pyaw ai gaw anga nga na re lam tsun da sai. Dai majaw, ndai zawn re daru magam hpung shingkang rawng ai Karai Kasang a kasha Yesu Hkristu shangai wa ai lam gaw, anhte yawng a matu kabu hpa Hkrisamat kumhpa kaba n rai ni?

3. Tengman ai hte awm dawm shanglawt ahkang aya hpe jaw ya na Yesu shangai sai

Karai Kasang gaw, tengman ai wa re lam Chyum laika hta law law lang tsun da nga ai. Tengman ai lam gaw, anhte hpe shalawt dat na re lam mung Chyum laika hta tsun da sai. Yesu Hkristu shangai wa ai lam gaw, tengman ai hte awm dawm ai shanglawt ahkang aya lu la na matu rai nga ai. (Pru Mat Wa Ai Laika 13:13) hta, mayam prat kaw na Irarela amyu ni hpe hkye shalawt la ai lam hte, shanhte hpe mayam prat de bai shadu na n rai sai lam hkam dahka ka da nga ai. Dai hpe yu yang, Karai Kasang gaw, mayam prat kaw na hkye shalawt la lu ai Karai, mayam prat hpe jahten kau ya lu ai Karai, mayam prat hpe n ju n dawng ai Karai re lam hpe mu lu ai. Dai majaw, (Galati 5:1) hta tsun ai gaw, “Anhte shanglawt tai na matu, Hkristu gaw anhte hpe shalawt dat mi ai: dai re ai majaw a grin nga nna, dai mayam a kandang npu e bai hkum ahkang nga myit,” nga tsun da sai. Karai Kasang gaw, shinggyim masha ni hpe Shi a tengman ai lam hta hkawm sa shangun mayu nna, Shi jaw da ai awm dawm shanglawt ahkang aya hpe lu la shangun mayu ai Karai rai nga ai. Karai Kasang gaw, shinggyim masha ni hpe n teng n man ai hte gyit hkang da hkrum ai kaw na shalawt la mayu ai wa re hpe (Luka 4:18) hta mu lu nga ai. Dai majaw, shinggyim masha shada gyit hkang da ai kaw na mung, tsadan nat e gyit hkang da ai kaw na mung, shanglawt lu na matu, Yesu Hkristu shangai wa ai re hpe myit dum nga ga.

4. Hkrisamat kaw na sharin la mai ai kumhpa

i) Yesu Hkristu, mungkan ga de yu sa wa ai ngu gaw, tsaw htum ai sumsing tingnyang kaw nna grit nem ai shinggyim mungkan de yu sa ai lam re hpe mu lu ai. Lachyum gaw, tsaw ai kaw na nem ai shara de yu sa ai lam rai nga ai. Grit nem ai shara de yu sa ai sha n-ga, yawng a matu machyi hkam nna, yawng a matu akyu jaw ai lam hpe galaw ya sai re. Grau htum ai sumsing tingnyang hpe kau tawn da nna, kaji htum ai Bethlehem mare de du sa ai; kaji htum ai Bethlehem mare kaw nna grau kaji htum ai wushat wakang de yu sa nna shangai wa sai. (Luka 2:4-7). Anhte sharin la mai ai lam gaw, Madu Yesu Hkristu a shagrit shanem ai lam hpe sharin la mai nga ai re. Kalang lang, shinggyim masha gaw grau ai de hkrai sa mayu nga ai. Raitim, Madu Yesu Hkristu gaw, grau hkik hkam ai de sa na hta, grau grit nem ai de chye sa na matu anhte hpe sharin ya nga ai.

ii) Madu Yesu Hkristu shangai wa ai Hkrisamat namchyim gaw, democracy namchyim re. Democracy namchyim gaw, shinggyim masha a matu (for the people), shinggyim masha hku nna galaw ai (by the people), shinggyim masha a nan re (of the people) ni rai nga ai. Ndai lam hte seng nna, Chyum laika hta tsun da sai. Yesu Hkristu shangai wa ai gaw, shinggyim masha ni a matu (for the people) re lam (Luka 2:11) hta tsun da nga ai. Bai, Yesu Hkristu shangai wa ai gaw, shinggyim hkum hkrang dagraw la nna shinggyim masha hku Karai Kasha sa tai ai lam hpe (Mahte 1:22-25; Yawhan 1:14) hta tsun da sai (by the people rai nga ai). Yawhan 3:16 hta, Madu Yesu gaw, shinggyim masha ni hpe hkye la na matu mungkan ga de jaw kau hkrum ai wa re majaw, shinggyim masha ni a Hkye la Madu Yesu Hkristu nan rai nga ai (of the people). Ndai lam hte seng nna, Sape ni hte Kasa ni law law wa sakse hkam da ai lam Chyum laika hta mu lu nga ai.

Dai majaw, Madu Yesu Hkristu shangai wa ai Hkrisamat aten hta, Hkrisamat namchyim gaw democracy namchyim re hpe Hkristan hpung masha ni sharin la mai nga ai. Ndai zawn re Hkrisamat namchyim hte bung ai Democracy masa hpe jawm gaw gap ai lam hta mung, Hkristan ni myit masin hkum hkrang n-gun lagaw ma hkra hte shang lawm ra ai lam hpe sharin la mai nga ai.

Ga Hpungdim

Madu Yesu Hkristu gaw, anhte hpe kaba la ai Hkrisamat kumhpa jaw da sai re. Anhte hpa kumhpa bai htang jaw na rai ta? Anhte htang jaw lu na kumhpa gaw mi n-nga dam nhten! Raitim, Madu Yesu a mungga hpe madat mara hkan nang hkan sa ai lam nan, Madu Yesu hpe Hkrisamat kumhpa bai htang jaw ai lam rai na re. Dai majaw, Karai Kasang a mungga hte maren tengman lam maga de tsap nna, mayam a kandang kaw na lawt lu ai ni tai let, Shaning Ningnan de lahkam sa wa ga law.

Chyeju kaba sai.

Sara Nhkum Tang Gun
Ramma Hpa-awn
Jinghpaw Wunpawng Hkalup Hpung Ginjaw (KBC)
Myitkyina, Jinghpaw Mung