"Ndai Nye a ga na nna, hkan galaw ai wa kadai mung, tinang a nta hpe lunghkrung ntsa e gap da ai hpaji rawng ai wa hte bung nga ai....Ndai Nye a ga n na nna, n hkan galaw ai wa kadai mung tinang a nta hpe zaibru jang e gap da ai masha angawk hte bung nga ai. Dai marang htu nna hka tung wa ai hte nbung bung wa nna, dai nta hpe wa ahtu wu ai rai nna dai gaw kadawng daw mat ai: de a kadawng daw mat ai gaw nyawp rap rai nga ai. (Mahte 7:24-27)"

Lai wa sai aten ni hpe bai myit yu yang Karai Kasang a makawp maga ai, lam woi madun ai, anhte a makau e arau nga ai lam hpe hkam sha nga ai. Daini du hkra asak hkrung nga lu ai ahkaw ahkang chyeju lu la ai lam gaw kaba la ai Karai Kasang a kaba la ai chyeju kumhpa rai nga ai. Anhte langai hkrai hta Karai Kasang a myit mada yaw shada ai lam kaba nga ai majaw rai nga ai.
Nang ngai hpe jahpu manu shadan ai majaw, anhte langai hkrai gaw manu dan ai ni rai nga ai.

Lai wa sai nhtoi ni hta galaw shut ai lam ni, sum mat ai lam ni, mai kaja ai lam ni, awngdang  ai lam ni law law byin lai wa na sai. Gade yak hkak ai lam raitim tawt lai la lu sai, sharin la mai ai lam ni rai sai. Mai kaja ai hte awngdang ai lam ni a majaw mung Karai Kasang a hpung shingkang hpe mu lu sai. Kaning re ai wa mi raitim ya chyeju dum let shakawn kungdawn na lam sha rai sai. Ya 'Shaning Ningnan' hta ganing rai asak hkrung nna nhtio ni hpe lai wa lu na rai kun?

Shaning Ningnan hta anhte a asak hkrung lam a ahkyak madung tawn ai lam ni gaw hpa baw ni rai kun? Tinang ahkyak madung tawn ai lam gaw tinang a asak hkrung lam hpe awngdang rawt jat shangun ai zawn, hkrat sum ai lam mung byin pru wa nga ai.

1. Karai Kasang hpe kamsham hkrit hkungga ra ai

Tsa ban 21 gaw hpaji prat re majaw anhte shinggyim masha ni gaw hpaji hpe tam shakut ma ai, sharin hkaja nga ma ai. Hpaji atsawm n chye yang aprat gaw hpang hkrat mat na. Hpaji n chye ai wa gaw masha ni a hpang hkan, shangun ma shatai na re. Hpaji hta kung hpan yang she amyu rawt jat na, masha uhpawng bawngring na, madu tai lu na. Hpaji n chye yang masha uhpawng hte amyumasha yawng hpang hkrat mat na nga nna tsun shaja nga ai ten rai nga ai. Hpaji gaw yawng mayawng hta ahkyak dik re, madung nan re nga ma ai. Daini na ten hta jaw ai lam langai rai nga ai. Raitim tsepkawp jaw ai, teng man ai lam rai nga ai kun?

Lai wa sai 10 ning jan hta Pyin Oo Lwi (Me Myu) kaw jawng boarder tawn na kasha la kasha lahkawng a matu kanu yan kawa hkyen ma ai. Ma yan lahkawng hpe jawng laika shakut, laika ram shangun mayu ai majaw mung rai, boarder tawn ai ngu ai gaw ja gumhpraw grai ma ai majaw mung rai na re. Kanu gaw kasha yan hpe ga htet ai ''Ja gumhpraw mung law law jaw tawn ai re majaw, ma yan e laika hpe sha shakut mu yaw... Laban Shani nawku jawng pyi n sa ra ai, laika hpe sha shakut mu yaw'' ngu nna htet tawn ai.

Ma yan nau mung kanu htet ai ga hpe madat ma ai.  Laban Shani nawku jawng de pyi n du mat masai. Ma yan nau tsang 10 awng ma ai. Dai hpang gaw ma yan nau kani ya tai, tsi kajam nna ahkyuk htawng de jahkring hkring du, kanu yan kawa gaw lu ai gumhpraw hte wa shaw la dat, tsi bai kajam dat, htawng rawng dat rai nna kanu yan kawa tam ai ja gumhpraw gaw htum ma mat wa sai, hka kap ma ai. Ya daini du hkra myit n su nga ma ai.

Kaja wa nga yang, Karai Kasang hpe shawng tam ra ai. Yehowa hpe hkrit hkungga ai myit gaw 'hpaji a npawt' nan rai nga ai. Karai Kasang hpe n hkrit ai wa gaw kaning re ai hpe mung n chye hkrit ai. Kanu kawa hpe mung hkungga la ra di na mung n chye ai, nanghpam lusha hpe mung n hkrit ai, nhkru nkaja ai amu galaw na mung n hkrit ai. Dai majaw hta la pyi n mai hkra hten run mat chye nga ai.

Karai Kasang hpe kamsham na, kamhpa na, hkrit hkungga na ngu ai gaw 'Shaning Ningnan' hta numbat (1) madung tawn na lam rai sai. Dai gaw hpaji byengya hte awngdang ai lam a npawt nan rai nga ai.

2. Chyum Mungga hta ngang grin nga ra ai

Chyum mungga hta hpung shingkang rawng ai, myit masin hpe shalan shabran ya lu ai, myit n su ai ni hpe hpaji jaw ai, myit masin hpe kabu shangun ai, san seng ya ai, aprat hpe galai shai ya lu ai, atsam marai nan rai nga ai (shakawn 19:7-9)

Anhte hkristan ni hta Karai Kasang hpe chye ai, kamsham ai nga ai hta myit dik mat chye nga ai. Tinang a wenyi n-gun rawng nna hkamja nga na matu hpa baw galaw ra na re hpe n dum n chye nga ga ai. Wenyi lam hta gawng kya nga ai, hkam n kaja ai gaw myi hte mu chye lu ai baw n rai nga ai. Wenyi atsam rawng nna n-gun rawng nga na matu gaw anhte hte hta nga ai chyum mungga hpe hti ra nga ai. Hpa mjaw nga yang, chyum mungga gaw anhte a asak prat lam hpe mauhpa shabyin ya lu ai majaw rai nga ai.

Karen (Kayin) hpu nau ni kaw nna shawng n'nan Karai Kasang hpe kamsham hkap la ai Ko Tha Pyu ngu ai wa gaw, sasana sara ni hte n hkrum shi ai ten hta masha sat ai damya wa langai re. Raitim Karai Kasang a mungga hpe na la nna kamsham ai hpang gaw masha ni hpe hkye hkrang la ai gabu kara shiga hpe hkaw tsun ai wa tai wa sai. Chyum mungga a majaw masha a aprat gaw tsepkawp galai shai nna san seng mat ai.

Dai hte maren, anhte Jinghpaw Wunpawng amyusha ni sasana sara ni garai n du ai ten hta ganoi mat mat ai amyu rai nga ai. Jinghpaw Wunpawng buga de sasana sara ni du sa nna Karai Kasang a Chyum Mungga wa jaw ai a majaw, daini du hkra mungkan ntsa grin nga lu ai, mungkan htum hkra grin nga na amyu re. Dai gaw Karai Kasang a Chyum Mungga hpe hkapla kamsham ai a majaw rai sai. Mungdan shara magup de mung du hkawm sa nna shanu nga lu saga ai. Hpaji hparat machye machyang madang tsaw wa sai. Lu su nga sai.

Chyum mungga gaw masha langai hkrai a asak hkrung lam hpe galai shai ya ai zawn masha amyusha yawng a gam maka, asak aprat yawng hpe galai shai ngang grin, rawt jat ya nga ai. Shaning Ningnan hta nang ngai galaw ai lam yawng hta awngdang wa lu hkra Karai a chyum mungga hpe shani shana hti nna, myit mang ra nga ai. (shakawn 1:1-3,Yawshu 1:7-9) Anhte ramma ni a asak hkrung ai lam gaw san seng nga lu ai n rai nga ai, dai majaw chyum mungga hte maren sadi nga ra ai. (shakawn 119:9)

3. Chyeju shakawn chye ra ai

Chyeju dum chye ai myit gaw Karai Kasang ra sharawng awng ai lam rai nga ai, Karai a arawng shapraw ai wa rai nga ai. (shakawn 50:23) Chyeju dum chye ai myit rawng ai gaw chyeju htang ai lam nan rai  nga ai.

Chyeju shakawn kungdawn ai gaw myit ngwi myit pyaw ai, kabu kara aw law lu ai hte atsam hpe lu la ai lam rai nga ai. Karai Kasang hpe shakawn kungdawn ai lam hta mauhpa atsam hpung shingkang rawng nga ai. Shakawn kungdawn ai lam hpe tsadan hte nat ni hkrit kajawng nga ai.

Mawhpa ngu ai Lahu mare hta sasana galaw ai sara Awliva tsun dan ai. Sasana galaw ai majaw mare masha nkau Madu Yesu hpe hkap la kamsham ma ai hte nawku hpung kasha langai byin pru wa sai. Lani mi na nhtoi hta nat jaw hkinjawng sara kaba wa hkristan hpung de sa nna ''Nanhte Yesu hpe kam ai ni mungga htawn akyu hpyi ai gaw hpa n ra tim, mahkawn shakawn ai lam hpe gaw chyeju hte hkum galaw ya myit'' nga nna hpyi nem nga ai.

Anhte hkristan ni gaw mahkawn shakawn ai hpung re majaw mahkawn n shakawn ai gaw n mai nga ai, hpa majaw mahkawn shakawn ai hpe pathkum mayu a ta ngu bai san yang ''Nanhte hkrstan ni mahkawn shakawn yang nat shaga n mai mat ai, nat ni gara de makoi hprawng ai re n chye ai majaw bungli n byin ai'' nga nna tsun dan nga ai.

Tsawra ai hpunau nu wa ni e..., ya Shaning Ningnan de shang wa ai aten hta chyeju shakawn ai myit masin hte, chyeju dum let shang wa ga. Du na ra ai shani nhtoi n'nan shagu hta jahpawt rawt wa ai hte anhte a myit masin hte n-gup ni gaw shawng nnan chyeju kaba la ai Karai Kasang, "thank you Jesus" nga ai hte nhtoi ningnan hpe hkap tau la ga. Aput angun re ai myit, aga ni hpe n myit ga. Tsadan hpe anhte a myit masin hte n-gup hta ahkaw ahkang n jaw ga. Shakawn kungdawn ai myit masin hte 'Shaning Ningnan Ninghtoi N'nan' hpe hkap tau yang dai shani nhtoi ni gaw myit ngwi myit pyaw let kabu gara nga pyaw na re.

Tsawra ai nu wa hpu nau ni yawng e..., anhte Wunpawng myusha ni yawng hpe hpan tawn da ai Yehowa Karai Kasang hpe kamhpa manoi let hkrit hkungga nga ga. Dai gaw hpaji a npawt majing re. Karai a Chyoipra ai chyum Mungga anhte hpe jaw tawn sai re. Chyum Mungga hpe hkap la sai majaw mungkan ga hta Jinghpaw Wunpawng amyusha ngu ai asak hkrung grin nga lu ai rai nga ai. Mungga hte sha amyu gaw bawngring gan ga galu kaba rawt jat wa lu ai re. Karai hpe malap kau Chyum laika hpe galoi n hti rai yang gaw Jinghpaw Wupawng amyu ngu ai gaw hkrat sum mat nna mungkan ntsa kaw nna mat mat na rai nga ai.

Karai Kasang hpe kamhpa hkrit kamyin let hpaji hpe hkaja sharin achyin nga ga, dai rai yang anhte Jinghpaw Wupawng amyu yawng hpaji hta kung jat ai ni tai na re. Chyum mungga hte nhtan n shai ai sha, Mungga matsun ga hte maren ngang ngang tsap, shani shana hti nna myit mang nga yang, anhte myit mang ai lam yawng byin tai awngdang wa na teng teng rai nga ai.

Madu Yesu a Mungga na nna hkan galaw yang lunghkrung ntsa e nta gap ai hpaji chye ai wa zawn tai ga, Mungga hpe na la nna n hkan galaw yang zaibru jang e gap ai angawk ai masha zawn nbung hte marang kaba htu yang 'nyawp rap' kadawng daw mat na ra ai. Du na ra ai shani nhtoi nnan shagu hta shakawn kungdawn let, mahkawn mangoi let, chyeju dum ai myit masin hte hpang wa ga. Ngwi pyaw simsa ai hte awngdang ai lam gaw anhte a matu rai nga ai.

Shaning Ningnan, Nhtoi Ningnan shagu, Ahkying Aten shagu hta Karai a hpung shingkang shadan lu ai ni, amyu hpe gaw sharawt lu ai ni, lam shagu hta awngdang lu ai chyeju hkam la lu ai ni anhte byin tai nga lu na matu (1) Yehowa Karai Kasang, (2) Chyum Mungga, (3) Chyeju shakawn kungdawn ai lam, ndai lam ni hpe n malap ga. Karai a hkum tsup ai chyeju hte hpring tsup ai Shaning Ningnan rai u ga. Aman.

Laika ka ai wa Sara Maran Hkun San gaw Myen mung Hkalup Hpung Ginjaw (Myanmar Baptist Convention, MBC) a ramma hpa-awn re.