Shiga

KIA Ba-3 shara ni tat sum nga ai hta, Dap Up wa ntsa tsun garu nga

KIO Sinpraw Ginwang ginjaw KIA Dapba-3 ginra, tinang shara ni lani hte lani hpyen wa Myen asuya dap lata de grau grau tat sum wa nga ai lam gaw, “Dapba Up wa hta grai lit nga ai” nga nna lawu tsang hpyendu hpyenma ni hte mungshawa ni lapran tsun garu nga masai.

Lai wa sai November shata kaw nna December praw 8 ya laman, tat sum ai tinang shawnglam dap shara (post) hte mare buga ni gaw--- KIA Dung-27 daju Balawng Dingsa, KIA Dung-15 daju Loi Ying, Prang Kadung, Lungja Kawng, Law Dan-Du Ra Kawng, Hpakawn, Man Da, Hkarawm Kawng, Sinlum Kaji hte Htingnan Kawng ni re.

Ndai zawn shata mi jan laman, nkau n tat ging ninglen yen kau shangun ai mabyin masa ni gaw, “BC (Brigade Commander snr dap up) Col Maran Tawng La a hpyen zai ladat hkrat sum ai lam hte tinang shawnglam hpyenma ni hpe aming jaw matsun ai gawngkya ning ra ai lam ni hta, grai madung ai” nga nna, lawu tsang dapshawa hte mungmasha ni KNG Jinghpaw Shiga Dap de tsun wa sai.

Bai, Dukaba Tawng La a matsun hte lai wa sai bat mi daram hta mung lu rim ai Myen hpyenla ni (captain madang langai lawm ai) hpe atsawm san jep ai lam n galaw shangun ai sha, Loije de dasang sa sa dat kau ai lam ni mung galaw wa sai lam, Mai Ja Yang shiga lawk tsun ai.

Shawng de KIO Masat 2 N’Gumla Lahta Tsang Jawng a jawng-up dingsa hte hpyen gasat mahkrum madup n nga ai, Dukaba Tawng La hpe Ba-3 a BC (dap up) hku nna 2007 ning htum wa de dang ai re.

Dai re majaw, ya ten hpyen masa laja lana shagyip shagyeng hkrum nga ai Dapba-3 de majan mahkrum madup law ai hpyen gasat ninghkrin hte ginra kungkyang ai wa Dukaba Hkun Htoi galai du wa jang gaw yawng hkrak rai na re nga nna, dapshawa mungshawa ni gaw, shi ntsa kam hpa ai hte marit gasit nga ma ai lam, dapshawa mungshawa nsen hte maren chye lu ai.

Dapba 3 de lama Dukaba Hkun Htoi du yu wa yang gaw, “Dapba 3 kata shi shalat da ai, shi npu na ma ni re majaw, du kaji kajaw lawu tsang ma ni yawng hkra gaw kalang bai wan chyi wa na masa nga ai” nga nna Sinpraw Ginwang Ginjaw, Mai Ja Yang na magam gun langai mung tsun ai.

Raitim, lai wa sai June shata hta Ta Hkaw Hka madim shimlam jaw ai gabaw hte Myen asuya dap ni KIA Dung-15 hpe n-gun kaba hte gasat ai majaw, Sanggang hte Bum Sen post lahkawng hpe tat kau ai shaloi Dukaba Tawng La ntsa kadai mara shagun ai lam n nga ai.