Dawhpumyang Pan Tsun post hpe KIA bai lu


Lahkawng ya Myen asuya dap ni zing madu ai Dawhpumyang, Pan Tsun post hpe KIA dap ni bai April 13, bat Manga Ya shana lu madu la sai lam, KIA hpyendu ni tsun ai.

Uhpung lahkawng dap lapran aten na na gap hkat ai hpang, ya na zawn KIO/KIA ginjaw Laiza makawp Dapba 5 npu Dapdung 19 a Lana Hkyet, Pan Tsun post hpe bai madu la lu ai re lam chye lu ai.

Laiza a dingda de deng 10 daram gang ai, hpyen masa hku ahkyak ai Pan Tsun post hpe April 11, bat Masum Ya shani Myen dap ni 120 mm laknak kaba n sim n sa gap ai majaw, gan yen kau ai re nga nna, shawnglam na KIA hpyenla ni tsun ai.

Myen Gumsan Magam U Ting Tsing asuya gaw KIO ginjaw Laiza hpe hpyen n-gun kaba hte gasat zing na hkyen nga sai majaw, ndai shata praw hta KIO gaw tinang KIA dap ni yawng de asuya dap hpe myu mare kaba n lata “shara shagu htim gap gasat na aming” jaw tawn sai re.
kachin-army-140412
Lai wa sai ten, maing June shata kawn March shata du hkra gaw, ginjaw ading tawk matsun hte maren “hkap hkan majan (ninghkap majan)” hku sha, tinang ginra de shang wa ai Myen asuya dap ni hpe loili je la gasat na ahkang sha jaw da ai re.

Ting Tsing asuya mung maren, shawng na Myen (Man) amyusha ni sha juk tek ai ginjaw asuya ni zawn, 1947 Panglong ga sadi hta ningpawt nna KIO hte jet ai mungmasa bawngban na n hkap la ai.

Masum lang ngu na Miwa mung Yunnan mungdaw Ruili (Shweli) kaw galaw ai Myen-KIO zuphpawng hta “mungmasa jahta ai ninggam de lahkam na bawngban ai lam” hkrat sum ai hpang, uhpung lahkawng dap lapran hpyen majan ni grau grau kaba nga sai re.