Shiga

KIA hpe gasat na Myen hte Ting Ying, Pangwa kaw zuphpawng

Pangwa kaw sa dung ai Myen hpyendap byu-ha hte Zahkung Ting Ying gaw May 8, mani bat Lahkawng Ya shani zuphpawng hpawng nna, KIA hpe matut gasat shamyit na bawngban wa sai lam, Pangwa shiga lawk hku chye lu ai.

Myen byu-ha mu a ga hta, “Ya gaw prat dep laknak ni mung lu sai re majaw, KIA hpe gasat na re” nga nna zuphpawng kaw tsun shaga wa sai lam, Pangwa shiga lawk tsun ai.

Ndai zuphpawng hta, lu rim ai KIA hpyenla langai tsun ai ga, “Pangwa de NDA-K amumadu dingsa Layawk Zelum hpung ni shaga ai majaw KIA ni sa ai re” ngu ai ga hpe mung, kahtap tsun dan wa sai lam, matut chye lu ai.



2005 ning September 14 ya hta, ya Myen hpyendap npu Jarit Sin Dap (Border Guard Force) de dap hkrang gale ai NDA-K (New Democratic Army-Kachin) uhpung kata ningbaw Zahkung Ting Ying hpe daru magam gashun ai lam byin wa sai.  Ndai n awngdang ai daru magam zing ai lam hpe amumadu dingsa Layawk Zelum hte hpaga lithkam Lauwa Zawng Hkawng yan woi awn ai re.

April 25 ya shani hta KIA n-gun 400 daram gaw Pangwa de shang wa nna mare hpe wang da ai lam galaw sai.

Raitim Myen hpyendap gaw Pangwa de byu-ha lawan ladan wa jung nna April 26 hte 27 ya shana ni hta, Pangwa mare bukda gawkngu bum hte Lupi Jarit Sin Dap Masat 1002 hpyendap hpe wang da ai KIA hpyen hpung ni hpe helicopter hte jet majan nbungli ni lang nna laja lana ninghkap gasat wa sai re.

Ndai zawn gasat dat ai hpang, KIA ni Pangwa mare hpe n lu zing mat ai, masing n awngdang mat ai. Raitim, ya ten du hkra Pangwa mare a dingdung de Hpare maga de gaw KIA hte Myen dap (BGF pawng hpawm) lapran shani shagu gasat poi ni byin nga ai lam, Pangwa buga masha ni tsun ai.

Nhtoi 15 ya gasat poi byin nga ai Pangwa ginra hta, uhpung lahkawng maga si hkala hkrum ai lam nga tim, jahpan hkrak n chye lu ai.