Shiga

Ka hkrang, yu ngwi pinra hte hpyen yen alu tam ai lam, Hpakan kaw galaw

Uru Sengmaw Ga na Jinghpaw Wunpawng ramma ni gaw ka hkrang, yu ngwi pinra hte hpyen yen tsinyam ni a matu alu tam ai lamang galaw sai re.

KIA Dapdung 6 woi awn ai hte lahkawng ya, May 15-16 alu tam lamang hpe Ginsi Seng Ra mare hpaji jawng wang kaw galaw ai hta Sengmaw Ga shara shagu de na ramma ni 40 jan lamang hta shanglawm wa sai re.

Lahkawng ya ka hkrang hte mahkawn ni hpe DVD gayet shapraw nna dut shabra ya na, lu wa ai ja gumhpraw ni hpe mungdaw kata majan ginra na hpyen yen tsinyam hkrum ai ni hpe garum jaw na matu re lam, lamang woi galaw ai ni tsun ai.

“Ya ten hta Wunpawng mungdan shara shagu ngu na daram ni hta majan byin nga ai raitim sut hpaga ginra rai nga ai Hpakan ga hta sha majan loi zim taw ai raitim, sut masa, mung masa lam hku nna mai galaw ai ladat hte shanglawt majan hta shanglawm nga ai re lam,” Lat Du Up Jum Nhkum Zau Doi kawn tsun sanglang dan ai.

Alu tam lamang de Lawng Hkang, Hpakan, Seng Tawng, Gwi Hka, hte Tamahkan hkan na lauban sutdu ni, company hkan na ni hte mung shawa ni sa du n-gun jaw sai re.