Shiga

Dumsu wa gap ai kawn Nang Zaw Yang kaw majan byin

Makoi mayang poi a matu, Waimaw, Nang Zaw Yang kaw dumsu wa gap ai kaw na Myen asuya dap hte KIA Mungshawa Hpyen Hpung (MHH) lapran, majan byin nga ai 3 ya rai sai.

Waimaw-Sam Pai (Sam Bai) lam Nang Zaw Yang mare na hpungtau langai, Waimaw mare kaw n nga mat ai.  Shi a makoi mayang poi hpe Waimaw kaw sha galaw na mare de dumsu wa gap ai kaw na majan byin hpang ai re.

“Makoi mayang poi hpe gaw ndai Waimaw kaw sha galaw ai. Mare kaw gaw masha langai mung n nga sai. Poi kaw lang na matu mare de wa na, shanhte a dumsu wa gap ai le, dai hpe Myen hpyen hpung ni gaw, Shanglawt ni shanhte hpe gap ai shadu ai she n rai i? Dai majaw shanhte bai gap wa ai. Ndai hku rai hpang ai majan dai hpawt du hkra naw byin taw ai” nga nna buga masha langai tsun ai.

Ndai majan gaw May 23 kawn May 25, bat Manga Ya du hkra matut manoi byin nga ai re.

Majan hta MHH hte dap mying n chye ai Myen asuya dap lapran byin ai hta, Myen hpyenla si hkala law ai hte, MHH maga mung hkala hkrum masha nga ai lam KIA ni tsun wa ai. Raitim KNG Jinghpaw Shiga Dap kawn shagrin lu ai lam n nga shi ai.

Waimaw ginwang shara shagu majan byin nga ai na sai raitim, ndai KIO a gaw sharawt mare Nang Zaw Yang hta gaw ndai majan shawng n’nan byin ai rai nga ai.

17-ning simsa lam ladaw, 1996 hta KIO kawn mare de gaw sharawt hpang ai Nang Zaw Yang gaw, ya ten, majan a majaw mare masha ni hprawng mat sai hte majan ginra byin nga sai re.