Shiga

Majan laning mi, Karai Kasang hta n-gun da ting akyu hpyi

Myen asuya hte KIO lapran dinghku majan byin ai, June praw 9, “laning mi hpring ladu hkrum nhtoi” hta, ramma ni Karai Kasang kaw arau sha n-gun da ting akyu hpyi hpawng hpe Jinghpaw mungdaw mare daju Myitkyina kaw galaw sai re.

Jinghpaw Wunpawng Hkalup Hpung Ginjaw, KBC Ramma Dap woi awn let akyu hpyi lamang hpe Nawng Nang Chyum Hkawlik AD 2000 Gawknu kaw galaw ai hta ramma jawngma n-gun 2,500 jan shanglawm sai lam, ramma ningbaw langai tsun ai.

Sa du lawm ai ramma jawngma ni hta Myitkyina hte Waimaw na sha n ga, dai mare kaba lahkawng kaw nga ai hpyen yen dabang (IDP camp) na mung lawm ai lam chye lu ai. Du sa ai ramma ni hta na marai 400 gaw tinang Jinghpaw htunghking, hkahku hking (palawng ahpraw hte labu) bu hpun let shanglawm wa sai lam chye lu ai.

Ndai lamang hta ‘Citizen of Burma Award’ kumhpa shagrau hkrum ai Kachinland News editor Sara Lahpai Naw Ming hte ‘7 Day News Hero Award’ kumhpa shagrau hkrum ai Sara Lagwi Myu Lat hku nna ading tawk Miwa mung kaw nna phone hte ramma ni hpe shatsam mungga jaw ai lam galaw sai.

KBC amumadu Hkalam Sam Sun mung Canada mungdan kaw nna du wa ai hte ramma ni hpe Karai mungga hte n-gun jaw wa sai lam chye lu ai.

Sa du lawm ai ramma ni yawng grai n-gun lu myit rawt ai hte “Anhte a awng padang Yehowa Karai Kasang” ngu ai ga si hpe 3 lang rau sha marawn tsun nhtawm ladu hkrum akyu hpyi hpawng lamang hpe ginchyum dat lu sai lam, woi awn ai ramma ningbaw ni tsun ai.

Ndai lamang de Myen asuya a SP (special police) pyada ni sa lawm kyin yu yu ai lam galaw ai raitim si mani ai ladat hte June 9 Majan Laning Mi Hpring Akyu Hpyi Hpawng hpe awngdang ai hku galaw la lu sai lam chye lu ai.