Shiga

Nawng Lut ginra hta hkawm sa hkawm wa yak

Yanam Ta shang wa ai ten Jinghpaw mungdaw Mungnyang (Mohnyin) ginwang, Nawng Lut (Indawgyi) ginra hta mung masha ni hkawm sa hkawm wa yak hkak hkrum nga ai lam, chye lu ai.

Mahkrai hte lam ni hten mat ai majaw mawdaw n mai lai hkawm mat ai. Dai majaw mawdaw saike hte sha hkawm sa ra nga ai lam buga masha ni tsun ai.

Mawdaw saike masha-htaw sha ai ni gaw, hkying hkum 2 daram sa ra ai Hupin hte Nawng Lut lapran marai langai hpe Kyat 6,000 hte htaw wa htaw sa galaw nga ai lam chye lu ai.

“Anhte a Indawgyi ginra kaw, Hupin kawn Nyawng-le-pin du pi mawdaw lam kaja wa na la taw ai grai na sai. Daini du hkra hpa n lak lai ai” nga nna buga masha langai KNG Jinghpaw Shiga Dap de tsun dan wa ai.

Ndai ginra na mawdaw lam ni gaw marang loi law htu ai hte shaning shagu hkawm sa hkawm wa yak ai re lam chye lu ai.

Nawng Lut ginra kaw sha Nam Mun mare hta shingbyi nga ai hpyen yen ni mung shanhte a kashu kasha jawngma marai 30 daram hpe jawng shalun na yak hkak nga ai lam chye lu ai.

Ndai jawngma ni jawng lung na matu jawng shabrai garum n’tum n lu yak hkak ai majaw hpyen yen tsinyam kanu kawa ni grai myit n-pyaw byin hkrum hkra nga ai lam tsun dan wa ai.