Shiga

Myen hpyenla 2 KIA dap de laknak ap shang

Myen hpyenla 2 gaw June praw 6 ya shani, Du La Nu woi awn ai KIA Dap, Mungshawa Kanau Mazum (MKM) hpyen hpung de laknak jahkrat rim hkam ai lam, KIA du langai KNG Jinghpaw Shiga Dap de tsun dan wa ai.

Dai hpyenla yan gaw, tinang Nahpaw dap Hk.L.Y Masat 105 na shaga mying Htun Myit Su hte Tan Tsing Awng rai nna, Nam San Yang MKM dap de wa rim hkam ai re nga tsun ai.

“Dai hpyenla yan gaw hka ja sa, shat mai namlap tam sa ai kawn hprawng wa ai rai ma ai da” nga nna Laiza na du langai tsun ai.

MKM dap ni gaw dai Myen hpyenla yan hpe atsawm sha nga da ai, bai tinang a buga de wa na matu tsun da ai, nga nna KIA du langai matut tsun ai.

“Anhte zingri ai lam n galaw ai, shat jaw sha ai gyin majaw da ai lam mung n galaw ga ai. Shan lahkawng hpe nta wa mayu jang wa mu, dai n rai yang mung Miwa mung de bungli sa galaw mayu tim mai ai ngu tsun da ai” nga nna KNG Jinghpaw Shiga Dap de tsun dan wa ai.

Majan bai byin wa ai kawn KIA hpang de, laknak ap shang wa ai Myen hpyenla 30 jan sai lam KIA du ni tsun ai. Shanhte hpe adup zingri ai lam n galaw ai sha tinang a nga shara de nhtang wa na ahkang jaw ai kaw madu jan kasha lu ai nkau mi hta lai na, law malawng gaw Myen hpyendap de bai wa na n kam ma lam, KIO Ningtau Ningbaw Amumadu-2 Salang kaba Lah Nan tsun ai.

Myen hpyendap ni chyawm gaw lu rim ai KIO/A bawng shing nrai n tsen ai mung masha ni hpe lu rim sai hte gaw, dusat hpe zawn zingri sat nat nga ai re.

Lai wa sai bat hta mung Myen hpyenla ni lu rim la ai KIA Dapba (4) na zazen Bala Brang Mai hpe shinggyim ahkaw ahkang tawt lai let, nga wuloi zawn lashoi shoi nna mare de dun hkawm, zingri lam ni galaw nga ai lam, dap ba (4) na du langai tsun ai.

Laiza ginjaw na KIA du langai mung “anhte a ginjaw kata kaw maigan dap ni ni aten hpring nga ai. Anhte Myen bawng ni hpe gara hku tawn ai shanhte mu ai chye ai. Myen asuya ni she anhte hpe gumlang hpung (Tawng-chyan-tu) law, tu-pung law nga tsun tim anhte gaw mungkan a hpyen tara hpe n tawt lai ga ai. Anhte KIA ni gaw mungkan a hpyen tara hte maren sha galaw ai” nga nna tsun ai.

Simsa lam a matu hkrum zup bawngban hpawng shagu hta KIO gaw Jinghpaw mung de htu tawn ai asuya shawnglam dap ni hpe hting nut ya na lang shagu tsun tim, hpyen n-gun jat bang dingyang re majaw majan mung matut manoi byin nga dingyang re.