Shiga

New Zealand du Jinghpaw ni hpyen yen alu tam lamang galaw

Jinghpaw mungdaw hte Sam mung dingdung daw kaw byin nga ai, dinghku majan a majaw, jam jau hkrum nga ai, hpyen yen tsinyam ni hpe garum na matu, New Zealand mungdan du Jinghpaw Wunpawng myusha ni kawn, lamang langai galaw wa sai hpe chye lu ai.

Ndai garum gumhpraw tam ai lamang hpe Wellington muklum a dingdung maga nga ai, Porirua mare kaw July 7 ya shana maga hkying 5 kawn hkying 7:30 du hkra galaw wa sai hte, sa du shanglawm n-gun jaw ai masha 300 jan re.

“Sa du wa n-gun jaw ai shan hpraw masha ni yawng rai yang 300 loi jan ai, asuya dap hkan na masha kaba ni sa du shanglawm garum madi shadaw lai wa sai,” nga nna ndai lamang hpe woi awn galaw ai, New Zealand Kachin Community a ningbaw Slg. Dau Hkawng tsun ai.

Ndai garum gumhpraw tam ai lamang hta, W.P myusha ni a htunghking ka manawt hte malu masha jaw sha ai lamang hku galaw lai wa sai hte Slg. Dau Hkawng kawn dai ni  KIO/KIA hte Myen asuya ni hpa majaw simsa lam n mai byin ai hpe sanglang dan ai lam chye lu ai.

Bai nna, shi gaw, Awng San Su Chyi, Norway, England mungdan hte kaga Europe mungdan ni hkan du hkawm nna, tsun shaga ai aten ni hta, Kachin state kaw majan tsinyam byin hkrum ai lam ni hpe tsepkawp n shaga shalawm ya ai majaw, W.P myu bawsang ni hkrum sha nga ai tsinyam ni hpe mungkan na ni n mu ya na hpe tsang ai lam ni mung tsun sanglang dan wa sai lam chye lu ai.

Ndai lamang hta sha Partner Relief Organization (PRO) na ni mung Jinghpaw Mungdaw kaw byin hkrum nga ai majan tsinyam lam hpe sanglang dan ai lamang langai hku nna shawa masha hpe tsun dan ai lam chye lu ai.

New Zealand mungdan hta Jinghpaw Wunpawng myusha ni gaw, Wellington hte Auckland muklum lahkawng hta madung shanu nga ai rai nna, Jinghpaw mungdaw na hpyen yen ni hpe garum na matu, shata mi hta kalang nta htinggaw shagu hpe garum gumhpraw hta lahkawng ai gaw, maning majan byin hpang wa ai kaw na re lam, Slg. Dau Hkawng tsun ai.

Ndai kalang na garum gumhpraw tam ai lamang mung, lahkawng lang ngu na lamang rai nna, Lai wa sai ten hta Auckland muklum kaw kalang galaw wa sai hpe chye lu ai.

“Anhte myusha ni tsinyam hkrum jam jau nga magang anhte shinggan nga ai myusha ni grau shakut ra magang rai nga ai, ahkyak dik gaw myit hkrum mang rum let jawm pawn ba la ra nga ai,”nga, Slg.Dau Hkawng tsun ai.