Shiga

U Lang Pa kaw Myen hpyen hpung hpe MHH ni 2 lang gap gasat

Jinghpaw mungdaw dingda Manje U, Lang Pa ginra hta Myen asuya dap mying n chye ai n-gun 50 grupyin hpyen hpung hpe U Lang Pa Mungshawa Hpyen Hpung (MHH) ni lai wa sai bat htum wa de 2 lang hkap gap gasat dat sai re.

June praw 6, bat Manga Ya shani hta Kai Htik makau Mahtek hte Lawa Yang lapran Myen hpyen hpung hpe MHH hpyenla ni hku nna bom kalang kapaw nna K.L.R bawm (4) lang gap bun dat sai lam, dai ginra na KIA Dap 27 shiga lawk tsun ai.

Hpang shani bat Kru Ya hta gaw Hku-Bung hte Maji Gung lapran Uma mare dingsa kaw bom (3) lang kapaw sinat kaji hte hkap gap, shanhte nan Ga Lup Bom langai kabye kapaw la ai kaw hkala nba masha law ai lam, KIA shiga lawk matut tsun ai.

Ndai MHH gaw KIA Dapba 3 npu Dapdung 27 npu shamu shamawt nga ai dap mung rai nga ai.

Myen dap maga hkala nba law ai majaw Mung Hkawng de wa tau la na hpyen n-gun shaga ai lam nga tim, kade hkrak si hkala hkrum ai hpe gaw n chye lu shi ai.

June shata laman, Myen asuya hte KIO salang ni KIO, Mai Ja Yang kaw lahkawng lang simsa hkrum shaga tim gap hkat jahkring lu ai lam n nga, hpyen majan ni dingyang byin nga ai re.