Shiga

Myitkyina Hkahtawlik lup wa hpe atik anang htawt shangun

Jinghpaw mungdaw Myitkyina muklum, Kawa Hka kahtawng na Hkahtawlik nawku hpung a shawa lup ding lup ra hpe, Myen asuya seng ang ai ni gaw, kaga malai shara n jaw ai sha, myit hprap wan jaw na masing hte, atik anang htawt shangun ai lam chye lu ai.

Asuya seng ang ai ni gaw, maning 2011 June shata kawn, lup htawt sit na matu, matsun wa sai raitim, mare masha ni n galaw ya ai majaw, ya kalang mi bai, matsun wa ai re lam chye lu ai.

Dai lup ding lup ra gaw lai wa sai, 1960 ning kawn hpang let, Shwi Zet, Kawa Hka hte P.L.N kahtawng na Hkahtawlik hpung masha ni shawng lup makoi hpang wa ai re majaw, mare masha ni n kam htawt ai lam chye lu ai.

Dai lup shara gaw, lam makau kaw nga ai majaw mung, htawt sit shangun ai rai nna, asuya kawn, kaga malai shara bai lajang ya ai mung n nga re majaw, kaga lup shara bai lu mari na matu, Hkahtawlik nawku hpung kawn, alu tam nga ai lam chye lu ai.

Lup shara hte seng nna, kaga tara shang, madi madun, lakmat ni mung n nga ai majaw, htawt sit ra sana re lam, Wajau Hkun Awng kawn tsun ai.

“Asuya gaw htawt hkrai htawt shangun taw nga ai, lumu ga malai jaw ai mung n nga ai. Kaja wa nga yang eka 20, 30 daram gaw bai jaw na re shadu ai wa, ya dai kaw n’nan lup ai lam ni mung n nga sai. Hkalup Hpung masha ni gaw, Jaw Bum kaw sa lup ai, anhte RC ni gaw, kade tsan tim, Rada Kawng de sa lup ra ai. Lup dingsa ni hpe mung ya du hkra n lu htawt shi ai,” nga nna, wajau wa tsun ai.

Lup dingsa hpe bai lu na masa n nga sai majaw, Wajau Hkun Awng kaw woi awn nna, lup n’nan bai lu na matu alu tam ai lamang ni galaw nga ai hte, July praw 9 ya shana hta mung, Jinghpaw Yu ngwi ninghkrin ni rai nga ai, Kareng Kai Dim, Lahtaw Zau Ding, Zau Doi Hkawng, Zau Mun Awng, Mun Pan, Lahpai Laja hte Kumhtung Seng Ra ni kawn, yu ngwi pinra hte alu tam ai lamang langai galaw wa sai lam chye lu ai.

Ndai lamang hta Jinghpaw yu ngwi dum shapaw hpung “Salum N-gun” kawn garum ai hte alu tam ai lamang ni hpe mung shanhte garum la ai hte galaw hpang wa ai re lam chye lu ai.

“Sen 80 snr 100 daram dan ai lamu ga lu jang ram sai, shawng de mung loili mahkawng da ai. Alu gumhpraw nga ai, raitim n law shi ai,” nga nna, Wajau wa tsun ai.

Lup dingsa kaw lup da ai moi mang ni hpe, kaga shara de n kam htaw ai majaw, buga masha ni gaw, Kawa Hka hte ni nawn ai shara kaw, lup n’nan bai lu mari na matu, lajang nga ai lam chye lu ai.