Shiga

Salang ni ginra masha myit n hkrum ai sha, Mali-N’mai Zup na hpun shaw

Jinghpaw mungdaw a dingdung, Chyinghkrang hte Tang Hpre mare kaw na mare salang ni gaw, mare masha ni n chye ai sha, hpun hpaga hpung ni hte pawng nna, hpun lagu shaw dut sha nga ai lam chye lu ai.

Mare masha ni myit n hkrum ai, hpun kran daw dut sha ai bungli hpe, mare salang ni gaw, Awng Myin Ta mare nnan a matu, laika dum galaw na matu ngu, madi madun na, tinggyeng akyu a matu Chyinghkrang hte Mali-N’Mai Zup mayan na hpun ni lagu shaw dut sha nga ai re lam, buga masha langai tsun ai.

“Hpun lagu shaw ai hpe mare masha ni kadai mung, myit n hkrum ai.  Laika dum a manu hta makau grup yin ni hten za mat na manu gaw grau law ai, mare kaw lang na, hpun ni mung yawng ma mat sana re.  Dai majaw, ndai zawn galaw taw ai lam hpe jahkring kau na matu, nkau mare masha ni gaw, ninghkap nga ai,” nga nna buga masha langai tsun wa ai.

Hpun lagu shaw dut sha nga ai kaw, woi awn ningbaw taw ai ni gaw, Awng Myin Ta mare up hkang du Slg. Myitung Naw Ja, USDP (Chyan Hkai Hpwi Hpyu Ye) pati zinlum ningbaw Slg. Marip La Ram, hpun hpaga la ni rai nga ai Slg. U Byit Tang Gun, Slg. Labang Sam Awng hte Slg. Lawaw Naw Mai ni re lam chye lu ai.

Hpun lagu shaw dut sha ai hte seng nna, Slg. Marip La Ram hpe matut mahkai yu tim n lu ai.

Hpun lagu shaw dut sha ai hpe ninghkap nga ai, mare masha nkau mung, mare salang ni a jahkrit shama ai lam hkrum sha nga ai hte, ndai lam hpe sa yu jep sagawn ai, Myitkyina asuya namkawn dap kaw na salang ni mung, ahkyak la ai lam ni n-galaw ya ai majaw, dai salang ni, mayun kum hpa sha ai lam ni nga na re ngu, mare masha ni kawn myit sawn da ai re.

“Laika dum galaw na matu ngu gaw tsun da ai, Chyinghkrang bum kaw na hpun ni shaw na galaw na nga re, mare masha ni gaw, laika dum galaw na hta anhte Chyinghkrang bum kaw na hpun ni ma mat sana re ngu tsun ai shaloi, woi awn ai lahkawng gaw, sen 30 dan ai laika dum hpe nanhte lit la na i nga na jahkrit shama wa ai re,” nga, Chyinghkrang mare masha langai KNG Jinghpaw Shiga Dap de shana wa ai.

Hpun lagu shaw dut sha ai kaw, woi awn ningbaw taw ai ni gaw, Mali-N’mai Hka madim galaw shakut nga ai, Miwa company CPI hte Asia World Company ni kawn mare masha ni hpe garum jaw ai lam hpe, grau law hkap la da ai ni re hte, Slg. La Ram gaw, hka madim masing a majaw mare htawt sit hkrum ai ni nga na matu , CPI kawn gawgap da ya ai, Awng Myin Ta mare nnan na dum nta kaja dik manga hpe, la madu da ai wa mung re nga nna, buga masha ni tsun ai.

Ya na zawn hpun lagu shaw ai majaw buga masha ni a matu, makau grup yin hten za ai hte shinggyim nau na hkra machyi shangun ai lam ni law law byin wa mai ai lam, Jinghpaw Wunpawng Bawngring Mahkri Shawn Hpung (KDNG) a tsun shaga ahkang lu, Shayi Ah Nan tsun ai.

“Buga masha ni hpe hkra machyi shangun ai lam ni law law byin wa sana re. Mali-N’mai Zup hka madim masing makau grup yin hta, mi kaw na hpun shaw ai ni nga chyalu re. Shan hte ni, nhprang sut rai, ja hte hpun zawn re ai ni hpe hka madim n-gaw gap shi yang yawng shaw sha kau na masing hte galaw wa ai majaw, ya ten hta, makau grup yin hten za nga ai lam ni law law byin taw sai re, dai zawn hten za ai lam, hkra machyi wa ai lam ni hpe Myen asuya maga na mung ya ten du hkra hpa n tsun shi ai.  Hpun shaw ai majaw byin hkrum wa ai, hten za ai lam ni hpe, ahkyak la ya ai lam ni n nga ai.  Ndai lam gaw, makau grup yin hten za ai lam hta n-ga buga masha ni a galaw lu galaw sha lam ni hpe mung hkra machyi shangun nga ai,” nga Shayi Ah Nan tsun ai.