Shiga

Miwa Nongdao dabang na Jinghpaw hpyen yen ni shara htawt sit hpang

Miwa mungdan Nongdao ninghtawn kata kaw shanu nga ai, Jinghpaw mungdaw hte Lahta Sam mung na hpyen yen ni gaw, Miwa asuya kawn, htawt sit na matu, kalang bai tsun wa ai majaw, tinang buga hte ni nawn ai de htawt sit hpang nga sai lam, hpyen yen komiti lithkam Sara Hkun Htun tsun ai.

Myen ga jarit N’Mau (Ruili snr Shweli) ginwang up hkang salang ni kawn, Miwa mungdan kata hprawng shang wa ai, hpyen yen ni hpe htawt sit kau ya na matu, KIO salang ni hpe tsun wa ai majaw, KIA Dapba 5 ginra Lana Zup de htawt sit na matu, hkyen lajang nga ai lam, KIO Hpyen Yen Lakawn Lanawn Komiti lithkam Salang Kaba Doi Pyi Sa tsun ai.

KIO maga na gaw, tara shang htawt sit na matu, hpyen yen ni hpe n tsun shi tim, htawt sit shangun ai nga shiga ni mawng taw ai majaw, hpyen yen nkau gaw, KIO kawn hkyen tawn da ya ai, Lana Zup dabang de n htawt ai sha, mi na ginra, nta hte ni nawn ai shara de, htawt sit mat ai lam chye lu ai.

Nongdao ninghtawn, Law Hpai hpyen yen dabang kaw shanu nga ai, kun dinghku 123 kaw na, kun dinghku 20 gaw, htawt sit mat sai lam, Sara Hkun Htun tsun ai.

“Ndai Law Hpai dabang kaw na ni, bat hpang mali ya shani hta htawt ma ai. Nkau gaw, Manwing de htawt ai. Nkau gaw ni nawn ai shara hkan sa shanu ai, asak grau kaba ai ni htawt ai re,” nga Sara Hkun Htun tsun ai.

Ya na zawn htawt sit ai shaloi, hpyen yen jawngma ni gaw, jawng htawt madi madun lakmat, madi shadaw laika pa ni n nga ai majaw, Nongdao hpyen yen dabang na jawngma 800 jan gaw, kalang bai htawt sit na nga yang, hpaji lam hta hkra machyi wa na re lam, Sara Hkun Htun tsun ai.

Ruili mare asuya salang ni gaw, lai wa sai, July praw 9 ya shani KIO Sinpraw Ginwang up hkang rung salang ni hpe, shaga la nna, Miwa mung kata hprawng shang wa ai, hpyen yen ni hpe, htawt sit kau na matu tsun wa sai hte, dai KIO salang ni mung, ginjaw de tang madun na she bai shana wa na ngu, tsun da ai lam, Sinpraw Ginwang up hkang rung a Salang Kaba Seng Li tsun ai.

KIO ginjaw rung kaw na mung, Miwa asuya kawn htawt sit na matu tsun wa jang gaw, htawt sit ya na matu, matsun wa sai hte, July 20 ya shani Miwa asuya kawn kalang bai kahtap tsun wa ai majaw, shara hkyen da ngut jang htawt sit ya na ngu KIO maga na shana da sai lam, salang kaba tsun ai.

“Shanhte gaw, Miwa mung kaw, hpyen yen ni hte seng nna, tara shang hkap la ai lam n nga ai da. Raitim, shinggyim nau na myit hte hkap la ya ai laning mi jan sai majaw, dai mung garum ai ga rai sai nga tsun ai. Shanhte bai n htang ap ai ga re. Nanhte n shaga la jang, Myen asuya hpe ap kau na nga du hkra tsun wa ai. Dai majaw, bai shaga na raitim kalang ta gaw n re ai, nga shara ni naw lajang ya na, hkyen ngut jang shaga na re ngu tsun da ai. Ndai shata kaw ngut hkra hkyen ngut jang she, dabang shagu na komiti ni hte bawng nna shaga la na re. Ya gaw dai hku sha naw tawn da ai, mung masha ni hpe mung, hpaji jaw na, shanhte dawdan ai hku hkan sa na matu tsun mayu ai,” nga salang kaba Seng Li sanglang dan ai.

KIO up hkang ginra Lana Zup maga htawt sit na matu, jawng ni, nga shara ni, lajang taw nga ai raitim, hpyen yen ni gaw, dai shara de n kam htawt sit ai lam chye lu ai.

“Lana Zup gaw, Nongdao hte tsan ai le. Shanhte gaw, Nongdao kaw nga na, shanhte a ginra de pru pru shang shang rai, namlaw namlap ni mung sa tam sha mai ai le. Ya gaw, Lana Zup kaw na nga jang grai tsan mat ai majaw, n htawt gwi ai re,” nga Salang Kaba Doi Pi Sa tsun ai.

Hpyen yen ni hpe htawt sit na matu hkyen lajang nga ai, Lana Zup gaw, Nongdao hpyen yen dabang hte deng 16 daram tsan ai rai nna, ya ten Miwa mung kata de hprawng yen shang wa ai, hpyen yen 10,000 jan rai sai lam, Salang Kaba Doi Pyi Sa tsun ai.