Shiga

17/1 tara dawm kau na matu mungchying datkasa Doi Bu tang shawn na

KIO/A hte Myen asuya hpyendap a lapran majan byin nga ai ten, asuya gaw Jinghpaw mungshawa ni hpe 17/1 tara hte maren jep rim ai lam ni law law galaw wa ai majaw, dai tara hpe dawm kau na matu asuya rapdaw de tang shawn ai lam hpe tara kasa hte mungshawa rapdaw datkasa Slg.jan Doi Bu galaw na re lam tsun ai.

17/1 tara gaw n tsen ai masha ni hpe mara sakse kata rim rawng htawng bang na ahkaw ahkang jaw tawn ai re.

Myen asuya kawn “ndai tara upadi lang na, Jinghpaw mungchying mungmasha ni hpe jam jau amyu myu jaw nga ai” re ngu, rapdaw de tang madun bawngban jahkrup mat na re lam, shi tsun ai.

“17/1 nga na, prat tup jam jau wa sai re.  Ya mung dai nga ai majaw, kade jam jau ai. Ndai 17/1 hpe bai lang ai gaw, n ju jang n ju ai hku, ra jang ra ai hku re. Gap hkat jahkring ai ten hta shaprai kau sai re. Ya gaw, ndau ai lam mung n nga, gumsan magam wa kawn, tara shang ndau ai lam mung n nga ai sha lang taw ai laning mi jan sai. N tara ai lam ni grai law sai, dai ni yawng hpe tsun shapraw na re,” nga shi sanglang dan ai.

Mungshawa ni maga na n tara ai hku, rim jep hkrum, tara shawk shawn hkrum ai lam ni hte seng nna, rapdaw kaw, kata lam tang shawn mat na re lam shi matut tsun ai.

“Lahtaw Brang Shawng na manghkang hta nga yang, tara rung kaw jep ai shaloi, kan kaw plasta shakap na nsen rim ai lam ni gaw, tara upadi hte grai nan n htan shai nga ai, 17/1 hpe lang ai seng ang ai ni galaw ai lam kachyi mi mung, n tara nga ai, ya gaw rapdaw nga ai, dai kaw, wanglu wanglang mai tsun ai, upade ngu ai gaw, mungshawa ni a mai kaja lam galaw na matu ka shapraw da ai re, dai hpe lang nna, mungshawa hpe ntara ai hku dang sha nga ai lam ni hpe, madung hku nna, tang madun mat na re,” nga shi tsun ai.

Maning, Myen asuya hpyendap hte KIO a lapran majan bai byin hpang wa ai ten kaw na, KIO hte matut ai ngu n tsen ai hte rim sharen da hkrum ai ni yawng, lai wa sai June shata du hkra rai yang, marai 29 nga ai hte, tara shawk shawn da ai lam n nga shi ai, manghkang 29 hte, kaga tup hkrak shiga n lu shi ai rim da hkrum ai ni mung naw nga ai lam chye lu ai.

Dai manghkang ni hte seng nna, rapdaw kaw, tang shawn lu na matu, mabyin ni a lam hpe tam sawk mahkawng nga dingyang re lam tara kasa Doi Bu tsun ai. Lai wa sai, July 27 ya shani hta tara shang masat da sai, Kutkai ginwang mungshawa dat kasa Slg. Tangbau Hkun Myat tang madun ai, bawsang myusha ni hpe makawp maga na tara upadi shangang shagrin da na hte seng ai, tang shawn ai lam hpe mung, tara kasa Doi Bu kawn, shawng n’nan madi shadaw lai wa sai hte bawngban jahkrup wa sai lam chye lu ai.

“Ndai ahkaw ahkang n lu ai majaw, anhte gasat taw ra ai, ndai bawsang myusha ni a ahkaw ahkang n lu ai majaw anhte prat tup gasat taw ra ai majaw, hkrat sum ai lam ni grai law sai. Lu ging ai ahkaw ahkang pyi naw n lu hkra, anhte hkam sha ra taw ai. Dai majaw, ndai tara upadi hpe shagrin nan shagrin da ra sai, ya gaw, tinang a ahkaw ahkang upadi n mai gyin shalat ai i nga yang, gyin shalat nna shagrin da na ahkang gaw jaw ai, raitim jaw ai i nga yang gaw bai n jaw re ai.  Jaw tim n lu ai nga baw rai taw ai,” nga nna, tara kasa Doi Bu tsun ai.

Bawsang myusha ni ra rawng ai, ahkaw ahkang ni a matu shawng ningnan galaw sa mat wa na re hte, dai hpang upadi 17/1 hpe shaprai kau na matu, kade n na ai ten hta, bawngban jahkrup lu na, myit mada da ai nga nna, asuya mungchying rapdaw rudi amyusha komiti a amumadu hte, Jinghpaw mungdaw, N’Jang Yang mungchying datkasa Slg.jan Doi Bu tsun ai.