Shiga

KIO a Share Shagan Nhtoi hta asak ap nawng sai share shagan ni hpe hkungga jaw

August shata praw 10 ya shani ang ai, 37 lang na, dai ning na KIO a Share Shagan Nhtoi gaw, shawoi shaning na hte shai ai hku nna, maning hte dai ning na majan laman, shawng lam majan hta, hkrat sum mat ai, magam gun myit rum ni hpe, myit dum shangun ai lam, KIA hpyendu langai tsun ai.

“Dai ni gaw hkrat sum mat ai, share shagan ni hpe, hkungga jaw shagrau ai shani re. Majan bai byin hpang ai mung, maning kaw na rai sai, hkrat sum mat sai, manaw manang ni mung grai law sai, shanhte hpe myit dum na, grai myit n pyaw ai,” nga KIA salang Mung Awng La kawn tsun ai.

Ndai kalang na, masat masa nhtoi hta gaw, Myen asuya hte KIO a lapran simsa lam a matu, myit hkrum ta masat n-galaw shi ai shawng daw de hkrat sum mat ai, share shagan ni hte, simsa lam hten mat nna, majan bai byin wa ai hpang, hkrat sum mat ai ni hpe, myit dum shangun ai lam, shi tsun ai.

Ndai lamang hpe, KIO ginjaw Alen Bum kaw galaw wa sai hte, KIO ningbaw ni hte hpyenla ni yawng 1,200 jan shanglawm wa sai rai nna, KIO ningbaw kaba Lanyaw Zawng Hra kawn KIO ningbaw ni a shakut shaja lai wa sai, magam bungli ni a labau hpe tsun dan ai hte, matut nna, myit hkrum mang rum let, shakut shaja sa mat na matu, tsun n-gun jaw wa sai lam, lamang shanglawm ai, KIA hpyendu langai kawn tsun ai.

Share Shagan Nhtoi hpe, Alen Bum, Mungshawa Tsirung, Laiza muklum na Rawt Ninghkawng Gawk Nu hte Je Yang hpyen yen dabang shara mali hta galaw wa sai hte, hkrat sum mat ai, Share Shagan ningbaw ni hpe, shagrau hkungga jaw ai lam galaw wa sai rai nga ai.

Ndai masat masa nhtoi hpe mungkan shara shagu du nga ai, Jinghpaw Wunpawng Myusha ni mung, galaw ai lam chye lu ai.

Lai wa sai 1975 ning hta KIO ningbaw ni rai nga ai, G.O.C Zau Seng rau kaga ningbaw ni Htai mungdan, ga jarit shara mi hta, gap sat hkrum ai, August shata praw 10 ya shani hpe KIO a Share Shagan Nhtoi ngu nna, tara shang masat wa sai rai nga ai.

Ndai nhtoi hpe 2005 ning kawn hpang let, KIO up hkang ginra ni hta, shaning shagu galaw nga dingyang rai nna, lamang hta hkrat sum mat ai KIO/KIA ningbaw ni, magam gun share shagan ni hpe shagrau hkungga jaw ai rai nga ai.