Shiga

Saga Pa mare masha ni a gumhpraw kyat sen 80 daram Myen hpyenla ni mya la

Myen asuya hpyenla ni gaw, Jinghpaw mungdaw Waimaw ginwang, Sadung makau na Saga Pa mare masha ni a gumhpraw kyat sen 80 daram hpe, nta shagu shang tam na mya la mat ai lam, mare masha ni tsun ai.


Myen asuya hpyenla ni gaw, Jinghpaw mungdaw Waimaw ginwang, Sadung makau na Saga Pa mare masha ni a gumhpraw kyat sen 80 daram hpe, nta shagu shang tam na mya la mat ai lam, mare masha ni tsun ai.

Lai wa sai August shata 11 ya shani Saga Pa mare makau kaw, KIA hte majan byin wa ai hpang, Myen asuya hpyenla 100 jan gaw, Saga Pa mare de shang wa nna, mare masha yawng hpe, nta manga kaw, rim bang tawn na, nta shagu hkan, shanhte ra ai hku, shang tam na, ya na zawn, gumhpraw ni la mat wa ya ai re lam, mare masha langai tsun ai.

“Mare masha ni hpe nta manga kaw mahkawng bang da ai, nkau gaw yu sin taw na, nkau gaw, nta shagu shang tam ai re. Nawku hpung na alu gumhpraw Miwa Yuan 21,000 lawm mat ai, nta langai hta, kyat sen 1, 2 lawm mat ai. Shanhte mare de shang wa ai gaw, hkying 9 daram rai na, hkying 2 daram hta bai pru mat wa ai. Shanhte wa mat ai hpang, yawng nta wa na bai tam yu yang, nga manga yawng la mat wa ya sai. Shan hte tsun ai, nanhte shawk shawn mayu ai nga jang shawk u da,” nga nna, Saga Pa mare masha langai tsun ai.

Ya na zawn, kam ai hku mare kata shang na, Nawku Hpung na alu hte, shanhte a gumhpraw ni la mat wa ya ai majaw, mare masha ni grai pawt nga ai lam chye lu ai.

Ya na zawn, dum mya lai ladat hte lagu lagut rai na, mare masha ni a gumhpraw ni mya la mat wa ya ai Myen asuya hpyendap gaw, Dapnu (Tat-Ma) Masat 88 npu na hpyen hpung ni re lam chye lu ai.

Mare masha ni gaw, hpyenla ni la mat wa ya ai, gumhpraw kade re hpe ka matsing na bai lu la na matu, seng ang ai ni kaw, tara shang hpyi shawn mat wa na matu, hkyen taw nga ai lam chye lu ai.

KIO hte Myen asuya lapran mungmasa jahkrup n lu hkraw nna majan byin wa ai ten, asuya hpyenla ni gaw, lusha hkyet mat ai manghkang hkrum nna buga masha ni kaw, hpyi sha ai, hkai sun hkan na, namlaw namlap, hkai nmai ni di sha nga ai lam, buga masha ni tsun ai.