Shiga

Miwa, Nongdao dabang na Jinghpaw hpyen yen ni wa na, KIO matsun

Miwa mungdan, Nongdao ginra kaw nga ai, hpyen yen dabang 6 kaw na, Jinghpaw Wunpawng myusha hpyen yen ni hpe, KIO ginra, Lana Zup hpyen yen dabang de htawt sit na matu, KIO salang ni kawn, August shata 15 ya shani matsun wa sai hpe chye lu ai.

Miwa mung kaw nga ai, hpyen yen ni hpe KIO kawn grau ni kahtep ai hte, yu gawn lajang lu na matu mung yaw shada ai re lam, KIO salang ni kawn, hpyen yen dabang shagu hpe tsun mat ai hpe chye lu ai.

Ndai zawn, htawt sit na matu, KIO hte Miwa mungdan asuya a lapran myit hkrum nna galaw ai re lam, KIO a Sinpraw Ginwang Mungchying Up Hkang Dap a Salang Kaba Dashi Seng Li tsun ai.

“KIO up hkang ginra kata kaw rai jang gaw, hpyen yen ni a hkamja lam, hpaji lam ni hpe yu lajang ya yang mai ai. Miwa mung kata kaw rai jang gaw, sarama ni laika gara hku sharin ya taw ai, jawngma ni a masa, hkamja lam ni hpe yu gawn lajang ya na matu yak ai. Sa mayu ai ten sa yu mayu tim n mai ai,” nga nna, KIO Salang wa kawn tsun wa sai lam, zuphpawng shanglawm ai, hpyen yen ni hpe garum nga ai, Slg. Gun Shawng kawn tsun ai.

Hpyen yen ni hpe, KIA Dapba 3 ginra na Lana Zup hpyen yen dabang gawgap ngut jang, ndai shata htum maga de, mawdaw hte saw htaw la na re lam, hpyen yen dabang ni de sa du shaga ai, Salang Kaba Seng Li hte Hpaji Du ni, Tsi Du ni, Wunpawng Ninghtoi Hpung, myu shayi hpung hte Ruili (Shweli) na garum ningtum hpung malawm masha ni yawng 20 jan kawn tsun shana wa sai hpe chye lu ai.

Tsun tawn da ai shara de n htawt sit lawm ai sha, tinang kam ai shara hkan, Miwa mung kata hkan nga taw na, manghkang byin wa jang gaw, KIO kawn lit la ya na n re lam mung, tsun shana da sai nga nna, Slg. Gun Shawng tsun ai.

August shata 14 ya shani hta gaw, Law Hpai hte Yang Lu hpyen yen dabang ni de tsun shana wa na, August 15 ya shani hta hpyen yen 630 nga ai Nga Nawng Pa hte Hka Dawng dabang ni de tsun shana wa sai rai nga ai.

August 16 ya shani hta gaw ngam ai, Lung Krawk hte Na Kawng dabang ni de sa du shana wa sai lam chye lu ai.

Hpyen yen dabang na hpaji du wa mung, ma ni a hpaji lam hte seng nna, myit tsang n ra ai lam, tsun wa sai hte, hpyen yen ni gaw, tinang a dum nta de wa na hta, ya nga taw ai shara kaw na, n kam htawt sit ai raitim, htawt sit na matu, matsun wa ai majaw, htawt ra sana re nga nna, tsun nga ma ai lam chye lu ai.

Lai wa sai July shata kawn hpyen yen dabang hta machyi makaw ana ahkya kap ai lam ni byin wa ai hpang, Miwa asuya kawn, htawt sit na matu, matsun wa sai hte, hpyen yen dabang seng ang ai ni kaw, Miwa asuya seng ang ai ni hte jahkrup lu ai majaw bai nga na ahkang lu ai rai nga ai.

Miwa asuya gaw, hpyen yen ni hpe nga na ahkang bai jaw ai hpang, KIO hte bai jahkrup na, ya na zawn KIO kawn hpyen yen ni hpe, tinang up hkang ginra de shaga la na, yu gawn lajang na masa bai byin wa ai rai nga ai.