Shiga

Myen-KIA gasat poi hta lahkawng maga hkrat sum ai lam nga

Jinghpaw mung hte Lahta Sam mung hta KIA hte Myen asuya hpyendap a lapran, majan matut manoi byin nga ai hta, August 15, bat Masum Ya shani hta n law htum shara masum kaw gasat poi ni byin wa sai re.

KIA Dapba 4 ginra Lahta Sam mung Mung Lung ginra na, Na Hka hte Taw Guk lapran Myen asuya hpyendap Hk-L-Y masat 95, Tat-Ma 88 pawng hpawm hpyen n-gun 70 jan hte KIA dapdung 34 ni a lapran gasat hkat wa sai hte, si, hkala hkrum ai ni nga tim, kade re hpe gaw, tup hkrat n chye lu shi ai lam, shawnglam shiga kawn chye lu ai.

Dai shani hta sha, KIA Dapba 5 ginra Dumbang Bum kawn Namsan Yang Ts-Y-Hp rung maga gale du wa ai, Myen hpyendap Hk-M-Y 390 na hpyen n-gun 100 jan hte Pau Se makau kaw KIA hpyen hpung ni a lapran majan byin wa sai hte, lahkawng maga na hkrat sum ai lam hpe gaw, n chye shi ai nga, Laiza daju KIA hpyendu langai KNG Jinghpaw Shiga Dap de tsun ai.

Majan byin ai ten, Dumbang Bum hte Lailum Awng Ja maga na asuya hpyedap ni kawn 81 mm laknak kaba hte Namsam Yang maga gap bun ai hte, Gangdau Yang daju asuya hpyendap kawn mung, 105 mm amyawk hte 17 lang gap wa sai re lam KIA shawnglam shiga tsun ai.

Lai wa sai August shata 13 ya shani KIA Dapba 4 npu Dapdung 8 hte Myen asuya pawng hpawm hpyen hpung ni kawn Magwibaw Bum kaw gasat hkat wa sai hte, KIA gyi jum langai hkrat sum nna, hpyenla langai hkala hkrum wa sai lam, Dapba 4 salang langai tsun ai.

August shata praw 8 ya jahpawt hta KIA Dapdung 8 ginra Mungmaw Pa, Manghai gat kaw myen asuya hpyendap Hk-M-Y 324 dap kaw na hpyenla 7 gat mari taw ai kaw, KIA hpyenla 6 kawn, shawa masha zawn bu hpung nna, shang gap ai kaw, KIA hpyenla langai hkrat sum na asuya hpyenla 4 si, langai hkala ai lam KIA hpyendu langai tsun ai.

Dai zawn byin wa ai hpang, KIA Dapdung 8 ginra hta Myen asuya hpyendap kawn, hpyen n-gun 300 jan bai jahkrat jat wa sai lam chye lu ai.

Myen asuya hpyendap gaw, KIA Dapba 4 npu, dapdung 34 Mungmi ginra hta dapdung 10 hte laknak kaba ni sa tawn sai rai nna, Man Dung ginra hta mung, Hk-L-Y 95, 116, 130, 114, Hk-M-Y 501, 502, 503 hte Dapnu (Tat Ma) 44, 88 dap ni hpe jahkrat da ai lam chye lu ai.

KIA dap ba 4 npu Dapdung 2 ginra Ying Maw, Ba Hpang, Loi Tawng, Loi Wawng, Shing Bwi hte Man Gang shara ni hta mung, Myen asuya kawn Hk-L-Y 241, 242, 290, 128, 129 kaw na hpyen n-gun 300 jan jahkrat da sai lam, Dapba 4 na KIA hpyendu langai tsun ai.

Ya ten hta, Myen asuya hpyendap gaw KIA hpyendap nga ai Jinghpaw mung hte Lahta Sam mung kaw na shara mali hpe madung hpyen n-gun jat bang nna htim gasat nga ai re hte, dai shara ni gaw, Dapba 4, KIO ginjaw Laiza, Sadung hte Pangwa ginra ni re.