KNG Jinghpaw

Tong Mali ja maw wan hkru, Kyat sen mun lam sum

Hugawng Pa na Tong Mali ja maw kaba wan hkru ai majaw dum nta gat seng 200 jan lawm mat nna, Myen Kyat sen mun lam sum mat ai lam, Danai buga masha ni tsun ai.

May 14, bat Langai Ya shani pyen 3 daram kaw nna wan hkru hpang ai gaw, hpang jahpawt hkying 3 daram du hkra re lam, chye lu ai.

Gat seng langai kaw nna wan hkru hpang ai hta, ja maw kata wan sat mawdaw ni mung n nga ai majaw gat rai hte ja htu arung arai ni ma hkra, wan hkru lawm ai re lam, Danai mare kaw nna salang langai KNG Jinghpaw Shiga Dap de tsun wa sai.

Wan hkru ai hta si masha nga ai lam chye lu tim, kade re ai hkrak n chye lu shi ai.

Ya ten, dum nta ginsum n nga mat ai hte lu na sha na yak ai masha ni hpe maw hte ni ai Hkristian nawku jawng ni hta shara jahkrat ya nga ai lam, Danai mare na Hkalup hpung sara langai tsun ai.

1994 Myen hte KIO simsa lam la ai hpang, Danai mare a sinna maga, Sagai ga jarit makau na ndai Tong Mali ja maw gaw Myen mung shara shagu na ja htu hkawng ma hkying lam zup ai ja maw kaba langai re.

• < Prev