KNG Jinghpaw

Hpakan na nhtang wa ai mawdaw jahpu, htam 3 lung

Jinghpaw mungdaw, Hpakan Uru Sengmaw ga hta Myen asuya dap hte KIA lapran majan laja wa na sat lawat a majaw hte, maw ga na masha nhtang wa ai ni law wa ai majaw, nhtang wa ai mawdaw shabrai htam 3 lung mat sai re.

Shawoi Myitkyina-Hpakan lapran, marai langai a mawdaw jahpu Kyat 20,000 sha raitim, ya 80,000 de gum htawn lung mat ai re lam, Hpakan na yu wa ai masha langai tsun ai.

Lungseng company hkan bungli galaw ai ni, Ye-ma-se hta ai ni hte gat dut sha ai ni gaw Mugawng hte Myitkyina mare ni de htawt yu wa nga ai lam chye lu ai.

Myen hpyendap gaw May shata praw kaw na Hpakan de hpyen n-gun grai wa jat ai majaw, KIA Dap 6 hte majan kaba byin hkyen ai majaw, Myen hpyendap gaw mung masha ni wa mat na matu May shata htum kaw matsun da ai re.

Ya ten hta Myen asuya gaw Ye-ma-se hta ai lam hpe pat hkum da ai hte hta ai ni hpe mung ahkyak la ai lam ni galaw nga ai hpe buga masha langai tsun ai.

Wa mat na matsun da tim n wa shi ai sha lungseng naw tam nga ai Ye-ma-se la ni hpe, Maw Siza kaw ndai June praw (7) ya shani, Myen asuya ni kawn nlung htaw mawdaw lahkawng hpring hkra rim woi mat wa ai lam, buga masha langai tsun ai.  Marai kade lawm mat ai hpe hkrak n chye lu shi ai.

Dai majaw Hpakan mawdaw ni gaw lung de masha n nga, yu wa maga de sha masha jawn ai majaw mung mawdaw shabrai hpu ai re lam Hpakan na yu ai masha langai tsun ai.

Hpakan Uru Sengmaw ga hta tam lu tam sha nga ai law malawng gaw bungli n nga, shang gumhpraw n nga ai hte shimlam mung n nga mat ai sha n ga, tinang buga de wa na matu mung lam jarik grai bai hpu, re ai lam ni a majaw jamjau hkrum nga ai hpe buga masha langai tsun ai.

Myen asuya ni kawn Hpakan mare hta jahpan nga buga masha ni hta lai na, bungli sa galaw ai, gat wa du sha ai ni hpe matut nga na ahkang n jaw ai sha, wa mat na matu matsun da ai lam chye lu ai.

Hpakan ginwang na masha ni mung Myen asuya dap hte KIA lapran majan laja lana byin hkyen wa ai majaw, shimlam a matu grai myit tsang nga ai lam chye lu ai.

• < Prev
• Next >