KNG Jinghpaw

Hpakan Ginsi Mahkrai hpaw poi, KIO galaw

Myen hte hpyen masa kang kahtet nga ten, Wunpawng Mungdan Shanglawt Hpung (KIO) gaw Hpakan, Uru Hka hku Ginsi Mahkrai hpe June praw 7, bat hpang lahkawng ya shani hpaw dat sai re.

Myen ginra kawn KIA Dapdung 6 ginra lungseng maw ni de ahkyak matut ya ai Ginsi Mahkai hpe ginra buga masha ni, seng htu seng shap ni, lauban launa ni hte gat dut gat sa ni yawng a matu hkawm sa hkawm wa kaja na yaw shada let KIA dap 6 woi awn gaw gap ai re.

Gaw gap lu sai hpri noi mahkrai hpe Karai Kasang kaw akyu hpyi ap ai lamang hta, Hkristan nawku hpung hkum hkra na hpung woi ni, Dap 6 du salang ni, ginra buga masha ni hte maw ga du mung masha ni shanglawm let wu wu di di galaw sai.

Ndai mahkrai galaw ngut ai majaw ginra masha ni hte maw ga du mung shawa ni yawng gaw grai kabu myit dik nga ai lam chye lu ai. Hpa majaw nga yang, grau nna Yanam Ta hta Uru Hka kaba ai majaw, hpun kawa wawn, jak li ni hte sha lai rap ra ai majaw re.

“Ndai mahkrai a majaw, Ginsi buga masha ni, lauban ni, lungseng htu ai ni hte hpaga la ni, Yanam Ta hta atsawm sha hkawmsa hkawm wa mai sai re majaw, yawng hkra kabu nga ma ai,” nga nna, Hpakan na buga masha langai tsun ai.

Ndai mahkrai hpe Dap 6 dap up Dukaba Yawngba Brang Shawng, shi nan woi awn n-gun dat nna gaw gap ai mung re.

Ginra masha ni hte maw ga du mungshawa ni a matu Yanam ten hkawm sa hkawm wa kaja na yaw shada let ndai Ginsi Mahkrai hpe shata 8 gaw gap ai re.

Ndai mahkrai a panglai tsaw madang pe 875 rai nna, mahkrai a galu de pe 293 hte gaw gap manu hkrak ang ai gumhpraw yawng Myen kyat sen 1,402 (Amerikan dollar 174,161 hte bung pre ai) re lam, mahkrai pawt masat lungpa hta ka da ai.

Mahkai ntsa hku mawdaw, mawdaw saike ni lu lai nna, li dik hkam lu ai shadang gaw ton 2 re.

Ndai KIO a Ginsi Mahkrai hte hpawn, ya ten, Uru Hka e mahkrai yawng 5 nga ai re. Ngam ai mahkrai 4 hpe Myen asuya gaw gap ai hta dai ni gaw Lawng Hkang mahkrai, Hpakan-Mashi Kahtawng hkrai noi hte wut bilat mahkrai, hte Seng Tawng mahkai ni re.

May 25 ya jahtum tawn KIA dap makau na Myen dap ni yawng n dawm yang gap na lam Myen hpe KIA sadi jaw dat ai majaw, uhpung lahkawng lapran hpyen masa yu sin sadi maja nga ten, Ginsi Mahkrai hpaw poi galaw wa ai rai nga ai.

• < Prev
• Next >