KNG Jinghpaw

Amyusha rawt malan, amyusha yawng gun hpai ra na lam KIO ndau

Mungshawa rawt malan bungli hta mungshawa ni yawng tinang nga ai shara kaw nna shanglawm gun hpai ra na lam hpe KIO Ginjaw Komiti gaw July 15 ya shani ndau shabra laika shapraw dat sai re.

Jinghpaw hku ka ai ndau hta “mungdan masha ni lu la ging ai ahkaw ahkang hpe lu la na matu Mungdan masha ni yawng shanglawm ai mungshawa rawt malan magam bungli hpe tinang nga ai shara kaw nna gun hpai ra na re majaw, Wunpawng Mungdan Shanglawt Hpung, Ginjaw Komiti a woi awn ai npu e, yawng lahkrip ra ra hte shanglawm wa na gaw ahkyak madung rai nga ai” nga nna hpaji jaw tawn ai.

Myen hte Shanglawt gap hkat nga ai masa kata, July 12-13 KIO ginjaw Laiza e mungshawa zuphpawng galaw ngut ai hpang ndai ndau laika (Myen hte Jinghpaw) hpe shale dat ai re.

Awmdawm shanglawt mungdan gaw de na matu KIO/KIA hpe Sam mung hte Jinghpaw mung na J.W mungshawa ni myit hkrum let 1961 hta hpaw ninghtan ai re.

1975 hta KIO/KIA kata ningbaw ningla ni sat hkrum ai mabyin hte 1994-2010 Myen hte simsa lam la ai ladaw, KIO/KIA du salang ni a tingkyeng sut masa lam hta baw bang ai lam hte, 2008 Myen hpyendap a Mungdan Gawda ai Tara hpe madi shadaw ya ai lam a majaw, KIO/A gaw tinang mungshawa ni hte mala hka wa nna hpyen zawn byin wa sai re.

Raitim, Myen hpyendap npu taw ai Jarit Sin Dap (Border Guard Force) hpe KIO/A n hkap la ai majaw, mungshawa ni a madi shadaw lam tsaw dik bai lu wa sai.

Ya ten, KIO/A gaw Panglung Ga Sadi hta ningpawt nna hpyen masa mung masa ladat lahkawng hte tinang J.W sha ni a lu ging ai mung masa ahkaw ahkang lu hkra shakut nga sai re.

 

• Next >