KNG Jinghpaw

Myen hte majan byin ai hta KIA du 1 hte hpyenma 4 si

Myen asuya hte KIA ni Myitkyina-Manmaw lam, Nalung mare na raba sun kaw lahkawng ya laja lana gap hkat ai hta, KIA maga du 1 hte hpyenma 4 hkrat sum nna kaga 7 hkala hkrum ai lam ginjaw Laiza na KIA hpyendu langai tsun ai.

Laiza makau, Laja Yang, Lung Rawk kawng de lusha wa sa jaw ai Myen hpyendap Hk.M.Y masat 230 hte 383 hpe KIA hpyen n-gun 150 ram hte hkap gasat ai hta Myen maga marai 14 si nna hkala nba law ai lam, shawnglam shiga lawk tsun ai.

“Anhte bai sa yu ai, nkau hpe gaw lup da ma ai raitim nkau mi gaw dai hku sha si taleng taw ma ai.  Anhte she bai hta lup kau ai. Mang yawng gaw 14 re.  Hkala ai ni mung grai law ma ai” nga nna shawnglam na hpyenla langai tsun ai.

Ndai majan gaw 28 hte 29 ya shani matut manoi byin ai rai nna, ya ten hta lahkawng maga shara bai la, hkyen lajang ai lam ni galaw nga ai lam matut tsun ai.

“Myen dap ni lusha wa sa ai re. Gap let shang mat wa ai, lagaw lam rai ma ai. Yawng gaw n shang ma ai nkau mi sha re. Ya chyawm gaw bai n htang mat wa masai” nga nna lahta na du langai matut tsun ai.

June 1 ya shani hta mung, lahta Sam mung Pangsai (Kyokok) makau na Yi-Hku mare makau hta KIA ginra de htu shang wa ai Myen hpyendap ni hpe Dapba (4) npu, dung (36) ni hkap gasat ai hta Myen hpyenla 6 si, 6 hkala hkrum ai lam, Dapba (4) na du langai tsun ai.

Jinghpaw mungdaw hta mung KIO ginra de asuya hpyendap ni htu shang wa ai majaw majan ni matut manoi byin nga ai lam chye lu ai.

Simsa lam bai lu hkra, Myen asuya hte KIO lapran manghkang byin ai shara na uhpung lahkawng shawnglam dap ni dawm na lam ntsa lang hte lang bawngban jahkrup nga ai raitim ya ten du hkra awngdang ai lam n nga shi ai.

• < Prev
• Next >