KNG Jinghpaw

Myitkyina n-gun madun poi hta asuya rung shawng hku lai na ahkang n jaw

Jinghpaw mungdaw mare daju Myitkyina muklum kaw, July 6, lai wa sai bat Manga Ya shani, Hkalup hpung up sara ni woi awn let, n tara rim hkrum ai hpyen yen tsinyam Slg. Lahtaw Brang Shawng hpe dat ya na matu, hpyi shawn ai, n-gun madun lam hkawm ai lam hta, seng ang ai ni kawn, asuya rung shawng hku n lai shangun ai lam chye lu ai.

Ndai ninghkap n-gun madun ai lam hta mung shawa masha 1,000 mi daram shanglawm wa sai hte, ndai zawn galaw lu na matu, Jinghpaw Mungdaw Hkringmang daju hpang de mung, ahkang hpyi laika bang chyalu raitim ya na zawn pat wa ai re lam chye lu ai.

“Pyada ni sinat hpai na sin taw ai, pyada du daju nta, masat langai pyada dap hte Hkringmang rung shawng hkan, n-gun madun ai lam n lu galaw dat ai,” nga nna, ndai lamang shanglawm ai ramma langai kawn tsun ai.

N-gun madun ai lam hpe, Myitkyina muklum gawknu, Mungdaw rung, Mungdaw pyada dap, hpyendap shimlam rung, ginwang rung, gaiwang rung hte mungdaw tara rung shawng hkan galaw na re lam, Hkringmang daju Lajawn Ngan Seng hpang de, June 29 ya shani laika bang nna, tara shang ahkang hpyi da tim, ya na zawn asuya kawn pat wa ai re hpe chye lu ai.

Jan Mai Kawng Hkalup hpung up sara ni kawn, ndai lamang hpe woi awn wa sai hte, tara shang galaw na ahkang n lu tim, dingbai dingna jaw ai lam n nga ai sha, galaw shangut la lu ai lam, shanglawm ai ramma ni kawn tsun ai.

Hpyendap shimlam rung hte tara rung shawng kaw du ai shaloi, KBC amumadu kawn, rim da hkrum ai, Slg. Lahtaw Brang Shawng hpe dat ya na matu hpyi shawn wa sai hte, Karai shakawn mahkawn mung mahkawn wa sai lam chye lu ai.

N-gun madun ai lam hta madung hpyi shawn ai lam ni gaw, rim tawn da ai, Slg. Brang Shawng hpe dat ya na matu, hpyen yen tsinyam ni a shimlam hpe makawp maga ya na matu, shinggyim ahkaw ahkang tawt lai ai lam ni hpe jahkring na matu, n tara ai sha rim ai lam ni hpe jahkring na matu hte Mungdan kata simsa lam gawgap na matu hpyi shawn wa sai hte, jahpawt hkying 9 kawn hkying 12 du hkra galaw ai re lam we awn galaw ai ni kawn tsun ai.

N-gun madun ai lam hta, Slg. Brang Shawng a madu jan kawn, shi a madu wa hpe dat ya rit nga Myen hku kada ai, laika pa lang nna, Jinghpaw, Myen hte Inglik laika hku ka da ai, “Jan Mai Kawn Jinghpaw Hkalup Hkristan KBC simsa ai hte n-gun madun ai masing,” ngu ai laika man lawm ai, sumpan pa hpe lang let, Jinghpaw hking ni bu hpun nna, galaw ai lam chye lu ai.

N-gun madun ai lam hta shanglawm ai ni a grup grup hpe sumri grang nna, Myitkyina muklum kaw na ramma 200 daram mung, shimlam la ya ai lam chye lu ai.

Lam dingdung, mung shawa ni kawn n-gun jaw ai hte n-gun madun ai ni hpe, sha hpa, lu hka ni mung gam jaw ai lam chye lu ai. N-gun madun ai ni mung lam n’maw dingdung, Karai shakawn mahkawn hkawn nna hkawm ai lam chye lu ai.

• < Prev
• Next >