KNG Jinghpaw

Miwa hkran na Jinghpaw hpyen yen ni, gawt hkrum nga

Jinghpaw mungdaw Manmaw ginwang kata, Manwin a man, Miwa hkran Nawngtau (Nongdao) hpyen yen dabang lahkawng kaw nga ai tsinyam ni hpe Miwa asuya ahkaw ahkang lu ni tinang buga de wa na gawt hkrum nga ai lam, tsinyam ni tsun ai.

Nawngtau mare kaw Jinghpaw hpyen yen dabang 6 nga ai hta, ya gawt shapraw nga ai gaw Yang Lu hte Law Hpai dabang lahkawng rai nna, Miwa asuya salang ni hte hpyenla 30 daram sa wa nna, hpyen yen ni hpe, tinang buga de dabang htawt sit na matu matsun wa ai re lam, hpyen yen ni hpe garum nga ai komiti malawm ni tsun ai.

Ya na zawn, Miwa mung uphkang salang ni hpyen yen ni hpe gau wa ai gaw, hpyen yen ni kawn wan n-gun hpe atsawm n chye lang na tsang ai, ana ahkya ni Miwa mungmasha ni kaw kap na tsang ai lam, Miwa myu sha ni a hkai sun kaw na nam law nam lap ni hpe, hpyen yen ni kawn, di sha ya ai lam hte Miwa mung masha ni hte rau jawm lang nga ai, hka pik ni hpe atsawm sha n jai lang ya ai ndai lam ni a majaw rai na re lam, garum nga ai komiti malawm ni kawn tsun ai.

“Hpyen yen dabang makau kaw, Miwa buga masha ni galaw da ai hkai sun nga ai, dai sun kaw na, ginsau si ni, hpyen yen ni kawn di sha ya ai da. Miwa myusha ni hte pawng lang nga ai hka pai (pipe) ni hpe mung hkrup mara di ya ai nga tsun ai. Bai nna machyi makaw, ana ahkya ni, shanhte a mung masha ni hpe kap na tsang ai dai majaw htawt shangun ai,” nga, komiti malawm langai KNG Jinghpaw Shiga Dap de tsun ai.

Raitim, dai hpyen yen dabang makau kaw nga ai, Miwa asuya hpyendap kaw na hpyendu kaba ni dabang de sa du ai shaloi gaw, htawt sit na matu n tsun ai sha, manghkang n byin hkra sha nga nna hpyen yen ni hpe atsawm sha yu gawn lajang na matu tsun ai lam chye lu ai.

“Dai hpawt maga de pyi hpyendu ni sa kawan ai, shanhte htet da ai gaw, hpyen yen ni hpe atsawm yu gawn lajang u nga ai re, ndai hkan kani dut ai lam ni nga jang mung shanhte hpe shana u nga tsun ai. Ya anhte hpe gau taw ai gaw, mung up salang ni re ai,” nga nna, hpyen yen ni hpe garum nga ai, sara Hkun Htun kawn tsun ai.

Miwa mung up salang ni gaw hpyen yen dabang lahkawng de July praw 6 kawn 8 ya shani du hkra masum lang sa nna, tinang a buga snr Lana Zup de htawt na matu matsun wa ai re lam chye lu ai.

Jinghpaw mungdaw kata, Lana Zup de htawt jang garum na re lam, Miwa mung up salang ni tsun tim, hpyen yen ni gaw, htawt na matu, myit n hkawn ai lam chye lu ai.

“Mani mung sa ai, lai wa sai shani mung Ruili (N’Mau snr Shweli) mare a uphkang salang hte Nawngtau mare up hkang salang ni sa na, rai yawng zing da u, hpawt de Lana Zup de htawt na matu, hkyen u nga tsun da ai,” nga nna, lahta na sara wa matut tsun ai.

Yanam Ta du wa sai rai nna, ma ni jawng lung ten mung re majaw, shara bai htawt sit na nga yang, ma ni a hpaji lam hta hkra wa na tsang ai majaw mung, n kam htawt ai lam chye lu ai.
“Shanhte bai sa wa na nga tsun da ai raitim ya du hkra gaw n du shi ai. Shanhte sa wa jang mung, n htawt sit na matu atsawm sha hpyi shawn na re. Shanhte gara hku mi tsun tim, hkam sharang na naw nga na re. Shanhte hpe hpyi nem tawngban nna nga na myit da ai,” nga sara, Hkun Htun tsun ai.

Nawngtau ginra kaw nga ai hpyen yen dabang ni gaw, Hka Dawng Pa, Nga Nawng Pa, Yang Lu, Na Kawng Kawng, Law Hpai hte Lung Krawk ni rai nna, hpyen yen ni gaw, Manmaw ginwang, N’mawk ginwang, Manje ginwang hte Nam Hkam ginwang mayan na ni re lam chye lu ai.

Dai dabang hkan, hpyen yen kun dinghku 982 nga nna, hpyen yen tsinyam yawng 4,596 nga ai hte, shanhte hpe Miwa mungdan na Hkalup Hkristan nawku hpung ni hte J.W Hkalup Hpung Ginjaw (KBC) kawn madung madi shadaw garum nga ai hte, matut nna, garum ningtum ni grai ra kadawn nga ai lam, dabang hpe lit la up hkang ai ni kawn tsun ai.

• Next >