KNG Jinghpaw

Myitkyina bawm kapaw ai kaw pyada 2 hkala

May 5 - Dai hpawt hkying 6 hte 7 lapran Jinghpaw mungdaw mare daju Myitkyina kaw matut manoi bawm 2 lang kapaw ai hta Myen asuya pyada 2 hkala hkrum ai lam, buga masha ni tsun ai.


Tatkone Shwe Lan-ma lam (Tatkone hte Hk.L.Y 37 hte matut ai lam), shata langai makau shara mi kaw hkying hkum mi jan din bawm lahkawng lang kapaw wa ai re.  Dai hta nambat 2 lang na bawm kapaw ai kaw pyada yan hkala hkrum ai re lam, myi-chyaw-sakse ni tsun ai.

Pyada ni gaw bawm kapaw ai shara hpe tam mu nna sumla gayet la ai lam galaw nga yang kalang bai bawm kapaw wa nna hkala hkrum ai re lam, KNG Jinghpaw Shiga Dap sagawn chye lu ai.

2011 June 9 ya, Myen asuya hte Wunpawng Mungdan Shanglawt Hpung (KIO) lapran, majan bai byin wa ai hpang Myitkyina kaw bawm kapaw ai lam ni jahkring hkring byin nga ai re.

Bawm kapaw wa shagu Myen asuya gaw KIO hpe mara shagun ai raitim KIO gaw mungshawa hte seng ai n gasat ai lam, ningdang tawn ai re.