Dai ning kani yi bai hkyen na PJS ndau

Dai ning kani yi bai hkyen na PJS ndau

Jinghpaw mungdaw kata kani yi dan shamyit ai masing hpe dai ning na kani mangai ten kalang bai galaw mat wa na re nga Wunpawng Amyusha Kani Nanghpam Pat Jasan Hpung kaw nna ndau dat sai re.

Ya ten kani hkai ai shara ni hpe yu maram nga dingyang rai nna jahpan hkum tsup ai hte aten dep bungli masing hpang na re nga Myitkyina Ginra Pat Jasan Komiti amu madu Sara Nhkum Tang Gun tsun ai re.

“Shawoi ka-ni yi hkyen ra ra re ai shara hta ya anhte survey galaw nga ai hku re. ndai Data ni lu ai hpang gaw anhte aten dep bungli shang ai lam mung nga na re. galoi aten hta ngu ai gaw ndai ka-ni hkai ai ka-ni mangai aten ladaw ndai laman hta aten dep gaw anhte bungli galaw na re”

Jinghpaw Mungdaw hte Kachin sub-state ginra ni hta gasat gala majan byin ai raitim Pat Jasan bungli matut galaw mat wa na re majaw, amyusha ni yawng jawm shakut shanglawm na matu Wunpawng Amyusha Kani Nanghpam Pat Jasan Masing Jum Hpajang Komiti a January 14 ndau hta saw lajin ai re.

Lai wa sai shaning February shata Slg. Zahkung Ting Ying woi awn ai BGF Jarit Sin Dap ginra, Kambaiti de Pat Jasan Ka-ni hkyen na matu shang wa ai ten, kani sun madu ni maga Myen hpyendap hte BGF dap ni maga lawm ai lam, kani yi hkyen shamyit masing n awngdang mat ai re.