Kasung hpyen yen ni galoi bai nhtang wa lu na n chye

Kasung hpyen yen ni galoi bai nhtang wa lu na n chye

Namti de a kajawng hpyen hprawng du wa ai Kasung mare masha ni lawan bai mare de nhtang wa mayu ai raitim Myen asuya maga ahkang jaw n jaw n chye shi ai re.

Hpyen yen ni mare de lawan ai hku nhtang wa lu na lam hte seng nna PCG, Myitkyina Simsa Lam Akyu Galaw Hpung gaw Jinghpaw Mungdaw Asuya de daini laika tang madun na hkyen nga ai lam, PCG lit nga Slg. Lamai Gum Ja tsun ai.

August 11 jahpawt daw, Myen hpyen ni Wunpawng Mungdan Shanglawt Hpyendap, KIA Dapdung 11 uphkang ginra Kasung mare de laknak kaba gap bun nna maja htu shang wa ai hte rau, mare masha ni mung maja hkum lawt daw sha ni nawn ai Namti mare de shingbyi wa ai re.

Ya ten Namti, Lambraw Yang Hkalup hte Hkatawlik nawku hpung lahkawng kaw du shang wa ai hpyen yen yawng 1,000 jan re.

Hpyen yen ni gaw mare kaw shanhte dai hku hprawng kabai kau da ai dinghku rai, sutgan hte dusat yam nga ni a majaw, sha n ga ya ten hkauna htu ten mung re majaw mare de nhtang wa mayu ai re lam, Slg. Lamai Gum Ja tsun ai.

August 10 ya shani kaw nna Myen hpyendap hte KIA Dung 11 lapran Kasung mare grupyin hta gasat gala majan bai byin wa ai re. Dai hta, Kasung de htim shang wa ai dap gaw Hk.L.Y 29 hte Mugawng daju Ts.K.Hk-3 npu Hk.M.Y 382 hte Hk.M.Y 383 re hpe sagawn chye lu ai.

Ndai lam ni Laban jahpawt daw htingnut mat ai majaw majan hkring mat sai re. Raitim asuya maga hpyen yen ni bai nhtang wa na ahkang jaw na ngu ai gaw tsun na yak nga ai re.

Hpa majaw nga yang Myen hpyendap gaw KIA Dap 11 hpe Myitkyina hpyenman maga hku mung gasat na matu ya ten Myitkyina e hpyen n-gun shajin nga ai hpe sagawn chye lu ai.

Rim hkrum ai Srn hte mare masha 11 lawt pru
Bat Manga Ya shani Myen hpyen ni Kasung mare de shang gasat nna rim tawn da ai Srn. We Tsai hte mare masha 11 gaw Laban Ya shana bai lawt pru nna Namti hpyen yen dabang de du nga sai re.

Shanhte hte rau, Bat Manga Ya shani majan kata chyat rawng mat ai hpyen yen 300 jan hpe mung PCG hte Jinghpaw Wunpawng Hkalup Hpung Ginjaw, KBC amu madu Rev. Hkalam Samson, ni Kasung mare du hkra sa nna wa shapraw la lu ai re.

Ya na zawn galaw lu hkra, PCG gaw Mungdaw asuya de August 12, bat Kru Ya shani ahkang hpyi laika tang madun ai hte maren, Myitkyina Myen Hpyendap Dingdung Daw Daju (M.P.Hk), Dap Up (taimu) wa ahkang jaw ai re lam, PCG tsun ai.